Монгол Улсын Ерөнхий сайд, МАН-ын дарга асан С.Баяр улс төрөөс завсарлага аваад багагүй хугацаа өнгөрөв. Энэ хэрээр түүний хаана, юу хийж байгаа, юу бодож байгаа нь олны сонирхлыг татаж, түүнд хандсан олон асуулт хэвлэлээр явах болсон. Тэгвэл С.Баяр хэвлэлд ярилцлага өгчээ. Канадад амьдарч байгаа түүний “Өнөөдөр” сонинд өгсөн ярилцлага олон асуултад хариулт өгснөөс гадна тодорхой эзэнд хаягласан зориудын гэмээр “мессежүүдийг” тээсэн байлаа.

Түүний ярилцлага дундаас хэсэгчилж авсан “1996 онд “Ардчилсан холбоо” эвсэл сонгуульд ялаад МАХН-ын харьяалалтай баахан хүмүүсийг ажлаас нь халсан. 2000 онд МАХН ялаад хариуг нь давуулж барьсан гэдэг. Түүнээс хойш сонгуулийн дараа намын харьяаллаасаа болж ард иргэд хэдэн мянгаараа ажилгүй болдог явдал хэвшил, ёс заншил шахуу болчихлоо” гэдэг өгүүлбэр тэр өдөртөө цахим ертөнцөөр жиргээчдийн дунд баахан нислээ. Улс төрийн намын харьяаллаар ажлаас чөлөөлөгдөж, эрх ашиг нь хөндөгдсөн хүмүүст энэ өгүүлбэр “өмгөөлөл, хамгаалал” мэт сайхан л санагдсан байх. Гэхдээ С.Баяр энэ тухай ярих гээгүй юм. Түүний хөндсөн “авлигын асуудал”-ын дэргэд намын харьяаллаар ажлаас халах энэ тэр бол үнэндээ жижиг хэрэг. Намчирхсан өргөн хонзогнол “төрийн албанаас халах” төдий биш “дээлийг нь нөмрүүлдэг” явдал болж хувирсан гэсэн санааг тэрбээр хөнджээ. Ашигт малтмалын лицензийн наймааны хэрэгт шүүхээс буруутгагдан ял сонссон Батхуягийн ард нутгийн ах С.Баярын нөлөө байсан гэх яриа бий. Нэлээд өргөн хүрээнд нууцгүй болсон энэ яриа түүнийг тойрч өнгөрөөгүй нь лав. Тийм ч учраас ийм хариулт шидсэн биз. “Дахиад хэлье. Авлигатай тэмцэх ёстой. Гэхдээ…” Энэ бол С.Баярын мессеж.

Авлига, албан тушаалын хэргээр өнөөдөр шалгагдагсад МАН-ын нөлөө бүхий гишүүд, эсвэл тус намын угшлийн нөхдүүд байгааг улс төрийн утгаар хэрэгжүүлж буй өс тайлал гэж үзэх үү? Эсвэл үнэхээр эрх мэдлийг олон жил хэрэгжүүлсэн МАН-ыг дайрах ёстой тавилан гэж үзэх үү? Ийм ацан шалаанд байсан олон нийт одоо авлигатай тэмцэгч Ардчилсан намд баяр хүргэх үү, С.Баярт талархал дэвшүүлэх үү. Чухам ийм эргэлзээ төрүүлэх, итгэл үнэмшлийг эргүүлэх нөлөөтэй учраас түүний дуугарахыг тодорхой хүрээнд хүлээж байсан биз.

“Хийсэн хэрэг хэзээ илчлэгдэх бол” гэж гэмтний дүрээр гэлбэлзэж суусан МАН-д энэ мэт улс төрийн өмгөөлөл болохуйц нэг биш мессеж АНУ-аас иржээ.  Хамтрахаас өөр сонголт өгөөгүй 2012 оны сонгуулийн дараа Ардчилсан намын хийсэн алхам “жижигдсэн” гэсэн дүгнэлтийг тэрбээр хийжээ. Стандарт бус Засгийн газар байгуулах түүний 2008 оны шийдвэр өнөөдөр ч “стратегийн” ач холбогдолтой, гэхдээ хамтрал зөвхөн “МАН-АН” гэсэн хувилбараар байх байсан юм гэжээ. Түүний энэ үг үнэнээс зөрүүтэй байж болох ч нэгийнх нь дарга “шоронд”, нөгөөгийнх нь дарга “гудамжинд” яваа  хоёр намтай Ардчилсан нам хамтарсан нь гашуун боловч гарцаагүй үнэн юм. Адилхан социализмын дошин дээр өсчихөөд хэн нь хэндээ ардчилал гэдэг хичээл заах гээд байгаа юм бэ?! Гадны хүний нүдээр бол аль нам нь зүүнийх, аль нь барууных гэдэг нь ялгагддаггүй төлөвшөөгүй, түүхий “бүтээгдэхүүнүүд” гэж С.Баяр ёжилсон нь МАН-ынхны загатнасан газар маажсан гэдэгт итгэлтэй байна. Жин дарах, олныг дагуулах хэмжээний лидергүй мэт болчихоод байсан МАН экс даргадаа “ватуум цаас бариулж, буйданд суулгах” мэтээр пиардаж байсны дэргэд С.Баярын үг байгаа онов.

“Ардын Намыг Монголын нийгэм төрүүлсэн. Тиймээс манай нийгэмд байгаа бүх л сайн, муу юм энд бас бий. Бусад намтай үүгээрээ адил. Ялгаа нь энэ намын түүх, даац, туулах чадвар гурав юм” гэжээ. Энэ бол хэний талаар юу гэж хэлсэн үг болохыг олон хүн төвөггүй ойлгоно.

Хамтарсан Засгийн газрыг санаачилсных нь хувьд С.Баярт оногдох гавьяа ч бий, гай ч бий. Гэхдээ түүний эзгүйд асуудал аль тал руугаа хандах нь, тэр тусмаа нам нь “хүчтэй сөрөг” байж чадахгүй байгаа өнөөгийнх шиг нөхцөлд цаг хугацаа явах тусам хаашаа эргэх нь бараг л ойлгомжтой байлаа. Хамтарсан засгийн үе хамгийн муу ул мөр үлдээсэн гэх тал нь дийлж эхэлсэн үед тэрбээр амжиж дуугарав. Эдийн засгийн өсөлт, улс төрийн тогтвортой байдал, Оюутолгойн гэрээ гэх мэт тэр үедээ “ололт” болж байсан олон зүйл өнөөдрийн засгийн өнгөн дээр бүдгэрч эхэлсэн. Макро төвшний өсөлтийг дор хаяж таван жил хадгалж байж, өрх гэрт өгөөж нь очих байлаа гэж хэлсэн нь угтаа ингэж чадаагүй нь хэний буруу вэ гэсэн асуулт юм. Мөн  Оюутолгойн гэрээг баллахыг хүсч буй хэсэгт хандан “Өсөн тэлж буй Монголын эдийн засагт өнөөдөр эргэлдэж байгаа мөнгөний гуравны нэг нь Оюутолгойн хаялга” гэж ерөнхийлөгч хэлсэн юм шүү хэмээжээ.

Тоолбол гурав, дөрвөөс хэтрэхгүй хэдэн гол мессеж тээсэн С.Баярын ярилцлага мэдээж цөөнгүй амтат “хачир”-тай байлаа. Охинтой болсон. Оюутан болсон. Загас, жараахай эргүүлсэн. За тэгээд “Ерөнхийлөгчийн сонгуульд нэр дэвшихгүй. Бас гадаадад цагаачлахгүй” гэсэн хариултуудтай. Гэхдээ тэр "Ерөнхийлөгчийн сонгуульд нэр дэвшихгүй гэдэг нээрээ үнэн үү” гэсэн дараагийн шинэ асуултыг хариултгүй үлдээж орхив.