Хангарьд ордонд өнөөдөр НИТХ-ын Барилга, хот байгуулалтын хороо, гэр хорооллын хөгжлийг дэмжих хорооны хамтарсан хуралдаан боллоо. Хуралдаанаар Улаанбаатар хотод метро байгуулах төслийн судалгааны ажил, Гэр хорооллыг дахин төлөвлөх ажлын явцын байдал, Гэр хорооллыг орон сууцжуулах төслийн ажил байдалтай танилцаж мэдээлэл сонслоо.

Хурлын эхэнд Улаанбаатар хотод метро байгуулах төслийн танилцуулгыг сонссон юм. Энэ асуудлын хүрээнд 2011 оны есдүгээр сараас эхлэн жил хагасын хугацаанд Японы Жайка олон улсын байгууллага Улаанбаатар хотод метро байгуулах талаар судалгаа хийж дуусгажээ. Метрог Толгойт өртөөнөөс Амгалан өртөө хоёрын хооронд 17.5 км-ын урттайгаар тавихаар төлөвлөсөн бөгөөд тус метроны 6.5 нь газар доогуур, үлдсэн хэсэг нь газраас өндөрт тавигдахаар зураг төслийг хийж тооцоо судалгаа хийсэн байна. Метрог барьж байгуулахад нийтдээ 1.5 тэрбум ам.доллар шаардлагатай аж. Хэрэв энэ оноос  ажлаа эхэлбэл 2020 он гэхэд ашиглалтад өгөх юм байна. Метроны замыг барих ажлыг улсын төсвийн хөрөнгөөр хийж дуусгахаар төлөвлөсөн бөгөөд үүнд нийтдээ 1.3 тэрбум ам доллар зарцуулах бол үлдсэн 200 сая ам доллараар бусад ажлыг хийж гүйцэтгэхэд бэлэн болгоод ирэх хаврын чуулганаар УИХ-ын чуулганаар хэлэлцүүлэхээр төлөвлөжээ.

Дээрх асуудлын хүрээнд төлөөлөгчид зарим зүйлийг тодруулж байв. Тухайлбал, Жайка судалгаа хийхийн өмнө Солонгосын компани мөн метро байгуулах ТЭЗҮ-г хийсэн гэсэн. Тэрхүү судалгааны ажлыг ямар хөрөнгөөр хэдий хугацаанд хийж гүйцэтгэсэн бэ гэж байв.

Үүнд холбогдох албаны хүн “Өмнө нь тиймэрхүү судалгааны ажил хийгдсэн. Гэхдээ бид Жайкагаар албан ёсоор судалгааны ажлыг хийлгэсэн. Яагаад Жайкаг сонгосон гэхээр нэгд Жайка тус судалгааг өөрийн хөрөнгөөр хийсэн. Хоёрт Жайкагийн шугамаар Япончууд бидэнд гурван бодит ажлыг хийж өгсөн. Тэр нь Нарны зам, Нарны гүүр, мөн гэр хорооллын сургуулиудын өргөтгөлийн ажил. Япончууд төлөвлөгөөгөө хатуу чанд баримталж, асар өндөр түвшний чанарын гүйцтэтгэлтэйгээр хийдэг. Хоёрт төлөвлөсөн хугацаандаа ажлаа гүйцэтгэдэг учраас сонгосон” гэлээ. Мөн метро барих ажлыг хийж гүйцэтгэх хугацаанд төв замын ачаалалд ямар ч саад учруулахгүйгээр гүйцэтгэж болох боломжтой гэдгийг судалгааны хэсэг тогтоосон болохыг онцлов.

Харин төлөөлөгч Г.Ганбаяр төлөөлөгч “Та бүхэн шинэ технологийн тусламжтайгаар төв замд ямар ч ачаалал учруулахгүйгээр метро барина гэж хэлж байгаа чинь худлаа. Би өөрөө метро барих ажлын явцтай Сингапур, Милан, Япон зэрэг орнуудад очиж танилцаж байсан. Тэр бүх орнууд авто замд хязгаарлалт хийж нэг эгнээгээр зорчдог болгосон байсан. Би энэ үгээрээ энэ ажлыг эсэргүүцэж байгаа юм биш. Бид бүхэн эрсдлээ нарийн сайн тооцоорой гэж л хэлэх гээд байгаа юм. Манай улсын хувьд газар доогуурх байгууламж барьсан ямар ч туршлага байхгүй тул болгоомжилж байна гэв. Эцэст нь хуралдаанаар метро байгуулах төслийн ажлыг сайшааж үндсэн судалгаанд яаралтай шилжүүлэх нь зөв гэдэг дээр санал нэгдлээ.