Афганистаны зүүн хэсгийн Жалалабад хотын цагдаагийн газар руу “Талибан” бүлэглэлийн амиа золиослогчид халджээ. Үүний улмаас таван цагдаа амь үрэгдэж, өөр зургаан цагдаа, долоон энгийн иргэн гэмтэж шархадсан байна. Афганистаны албаныхны мэдээлснээр цагдаагийн газрын байр руу иж бүрэн зэвсэглэсэн долоон амиа золиослогч халдаж бөмбөг дэлбэлжээ.

ВВС-ийн мэдээлснээр хамгийн түрүүнд нэг амиа золиослогч зогсоолд байрлуулсан автомашинд бөмбөг дэлбэлсэн байна. Үүний дараа тэсрэх бөмбөг бүхий хантааз өмссөн өөр гурван амиа золиослогч цагдаагийн газрын удирдлагын байранд нэвтрэн бөмбөг дэлбэлжээ. Харин цагдаа нар үлдсэн гурван амиа золиослогчийг бөмбөг дэлбэлэхээс нь өмнө амжиж амийг нь хөнөөсөн байна.

“Талибан” бүлэглэлийн зүгээс дээрх халдлага нь цагдаагийн газар байрлаж байсан гадаадын иргэд болон Израилийн багш, сургагч нарыг хөнөөх зорилготой байсан хэмээн мэдэгджээ.