Автомашингүй өдөр болон Автомашингүй өдрийг угтсан 7 хоног 3 сарын 24-31-нд Улаанбаатар хотод зохион байгуулагдана. Энэ жилийн Автомашингүй өдөр нь “Автомашингүйгээр цэвэр агаарт хамтдаа” уриатайгаар хэрэгжиж байна. Өчигдөр “Явган алхалт, хөдөлгөөнийг дэмжих өдөр” болж, иргэд  “10,000 алхам” мини аялал хийсэн бол  өнөөдөр /3 сарын 25/ “Зам тээврийн ослоос сэргийлэх, хөдөлгөөний соёлын өдөр” бөгөөд Замын цагдаагийн газар, Замын хөдөлгөөний удирдлагын төвөөс замын хөдөлгөөнд оролцож буй жолооч нартаа дуут дохио дуугаргахгүй, дүрмээрээ соёлтой явахыг уриална.

Мөн, зам тээврийн осол гэмтлээс сэргийлэх сурталчилгааг Нийслэлийн тээврийн газар,  Монгол даатгал компанитай хамтран явуулах юм гэж нийслэлийн Хэвлэл мэдээлэл, олон нийттэй харилцах хэлтсээс мэдээллээ.