Ази тивд хоккейгоор зэрэглэл доогуур орнууд өрсөлддөг “Challenge Cup-2013” тэмцээн Тайландын нийслэл Бангкок хотноо үргэлжиж байна.

2008 оноос эхлэн жил бүр зохиогдож эхэлсэн тус тэмцээнд 10 улсын баг оролцож байгаагаас манай хоккейчид В хэсэгт Энэтхэг, Макао, Хонгконг, Сингапур улсын багуудтай нэг хэсэгт орсон. А хэсэгт АНЭУ, Тайланд, Малайз, Тайвань, Кувейт улсын баг багтжээ.

Тэмцээний хэсгийн тоглолтууд энэ сарын 16-21-ний хооронд явагдсан бөгөөд хэсгээсээ эхний дөрвөн баг шигшээ наймд шалгарлаа. Манай хоккейчид хэсэгтээ Энэтхэг (20:0), Макао (6:1), Сингапур улсын (3:2) багийг хожиж Хонгконгийн багт (7:3) хожигдсоноор хэсгээсээ хоёрдугаар байраар шалгарсан. Улмаар хагас шигшээд шалгарах эрхийн төлөө тус тэмцээний хоёр удаагийн дэд аварга Тайландын багтай өчигдөр тоглож 5:4-ийн харьцаагаар ялалт байгуулаад байсан. Тэгвэл өнөөдөр мөнгөн медалийн төлөө Хонгконгийн багтай тоглож 4:3-ийн харьцаагаар ялагдал хүлээлээ. Тус тоглолтод довтлогч Ц.Шинэбаяр хоёр, Г.Нэгүүн нэг гоол оруулсан байна.

Манай хоккейчид маргааш хүрэл медалийн төлөө Тайвань болон Кувейтийн хожигдсон багтай нь тоглох бөгөөд тоглолт Улаанбаатарын цагаар 14.30 цагт эхэлнэ.

Хагас шигшээд Монголын шигшээ багийг хожсон Хонгконгийн багийн хувьд В хэсгийг дөрвөн хожилтойгоор тэргүүлж АНЭУ-ын багийг 6:3-ийн харьцаагаар буулган авснаар манай багтай дахин учраа таарсан. Хэсгийн тоглолтод Хонгконгийн баг манай хоккейчдийг 7:3-ын харьцаагаар илүүрхсэн бол энэ удаа ч 4:3-ийн харьцаагаар хожсоноор "Challenge Cup-2013" тэмцээний цомын төлөө өрсөлдөхөөр боллоо. Хонгконгийн багийн хувьд тус тэмцээний анхны тэмцээнээс хүрэл медаль хүртэж, 2011 онд түрүүлж байжээ.

Тайваний шигшээ баг тус тэмцээнд хоёр удаа (2008, 2010) онуудад түрүүлж байсан бол Кувейтийн багийн хувьд хараахан медаль хүртээгүй байна.

Монгол улсын шигшээ багт "Хангарьд", "Залуус сан", "Жалам хар", "Занд Т", "Отгон од", "ЭмСиЭс" клубийн тамирчид багтжээ. Багийн дасгалжуулагчаар Э.Шинэбаяр, довтлогчоор Б.Цэрэнбалжир, Ч.Пүрэв-Очир, Э.Энхтөгс, Ж.Баярсайхан, Э.Мөнхзаяа, Н.Хишигсүрэн, П.Батзаяа, Ц.Шинэбаяр, З.Од-Эрдэнэ нар тоглож байна. А.Алтанбаяр, А.Эрхбаяр, Б.Болдбаяр, Г.Тамир, С.Оч нар хамгаалагчаар, Б.Мөнхболд, Э.Улсболд нарын хаалгачаар тоглож буй.