Соёл, спорт, аялал жуулчлалын дэд сайд  М.Түмэнжаргал, хуулийн хэлтсийн дарга Д.Гэрэлчулуун нар Монгол Улсын Ерөнхийлөгчийн 151 дүгаар зарлигийг хэрэгжүүлэх хүрээнд олимпийн наадам, паралимп болон олимпийн наадмын төрөлд багтдаг спортын төрлийн дэлхийн аварга шалгаруулах тэмцээний медальт, нас барсан тамирчдын ар гэрийнхэнд буцалтгүй мөнгөн тусламж гардууллаа. Нийт таван тамирчны гэр бүлийнхэнд мөнгөн шагнал гардуулсан байна. Тодруулбал,
 
“Мехико-1968” олимпиос чөлөөт бөхийн төрөлд хүрэл медаль хүртсэн Гавьяат тамирчин Т.Артаг агсны гэргий Д.Баярлахт 24 сая төгрөг,

“Москва-1980” олимпиос мөн чөлөөт бөхийн төрөлд мөнгөн медаль хүртсэн Ж.Даваажав агсны охин Д.Баярчимэгт 36 сая,

1971 онд Болгарт болсон чөлөөт бөхийн ДАШТ-ээс мөнгөн медаль хүртсэн ОУХМ Б.Жамсран агсны охин Ж.Буянхишигт 12 сая,

1985 онд Унгарын Будапешт хотод болсон чөлөөт бөхийн ДАШТ-ээс хүрэл медаль хүртсэн Гавьяат тамирчин Лу.Энхбаяр агсны гэргий Д.Алтанцэцэгт зургаан сая,

1982 онд Германд болсон боксын ДАШТ-ээс мөнгөн медаль хүртсэн Гавьяат тамирчин Р.Отгонбаяр агсны охин О.Уянгад 12 сая төгрөгийг тус тус олгожээ.