“Оюутолгой” ХХК-ийг тойрсон мэдээллүүд дэлхий нийтийн чихийг дэлдийлгэх үйл явдлын нэг болоод удаж байна. Оюутолгойн хөрөнгө оруулагчид байсхийгээд хуралддаг ч зөвшилцөлд хүрэлгүй өнөөдөртэй золгоод байгаа. Монгол Улсын Засгийн газрын зүгээс хөрөнгө оруулалтын хэмжээ нэмэгдсэн шалтгааныг тайлбарлахыг хүсч буй бол “Рио Тинто” Засгийн газраас хөрөнгө оруулалтын эхний хэсгийн санхүүжилт шаардаж байгаа. Харин олон улсын төвшинд энэхүү гэрээний талаар олон талын мэдээлэл цацагдаж буй юм. Тиймээс бид Сангийн яамны урилгаар Монголд ирээд байгаа  Ботсвана улсын Төв банкны дэд ерөнхийлөгч асан Кайт Жеффрисээс Оюутолгойн талаар ямар бодолтой явааг сонслоо. Тэрбээр хэлэхдээ:

-Яг үнэндээ гэрээ ямар нөхцөлөөр хэрхэн байгуулагдсаныг мэдэхгүй учир дүгнэж хэлэх боломж муу байна. Ямартай ч аливаа гэрээ хэлэлцээр байгуулаад дараа нь буцна гэдэг дэлхий нийтэд маш тааруу сигнал илгээдэг. Засгийн газар солигдох бүрт гэрээг өөрчлөх боломжгүй. Ингэх нь тухай улс орны нэр хүндийг унагаад зогсохгүй хөрөнгө оруулалт татах боломжийг хязгаарладаг гэдгийг хэлье. Ер нь бол олон улсын чанартай, урт хугацааны гэрээг байгуулахын өмнө чадварлаг баг бүрдүүлэн нарийн нягталсан гэрээ хийх л хамгаас чухал. Ботсвана улсын хувьд DBRS компанитай 50:50 хувийн хөрөнгө оруулалттай гэрээг 81 хувийн ашиг эзэмших боломжтойгоор байгуулж чадсан. Тэгэхээр боломжтой бол Оюутолгойн гэрээг хөндөхгүй байхыг сануулъя гэсэн юм.