Өмнөд Солонгосын зарим банкууд болон олон нийтийн мэдээллийн хэрэгслүүд өнгөрсөн лхагва гаригт хакерын дайралтанд өртсөн талаар мэдээлсэн билээ. Өмнөд Солонгосын зүгээс банк, санхүүгийн компаниуд болон хэвлэл мэдээллийн хэрэгслүүдийн сүлжээнд нэвтэрч, 32 мянган компьютерийг хэрэглээнээс гаргасан хакерын дайралтанд албан бусаар хойд хөршийг сэжиглэж байсан юм. Харин энэхүү халдлагыг хойдууд биш Хятадууд үйлдсэн болох нь мөрдлөгийн явцад илэрчээ. Өмнөд Солонгосын “Yonhap” мэдээллийн агентлагийн мэдээлснээр цахим гэмт хэрэгтэй тэмцэх албаныхан хакеруудын “IP” хаягийг мөшгин дагасны эцэст хятадууд дээрх халдлагыг үйлдсэн болох нь илэрсэн аж. Одоогоор Өмнөд Солонгосын албаныхны зүгээс цахим мөрдлөгийг үргэлжлүүлэн хийж байгаа юм байна.

Хойд Солонгосын зүгээс НҮБ-аас тус улсын эсрэг авч хэрэгжүүлж эхэлсэн шинэ хориг арга хэмжээний улмаас  Өмнөдтэй 1953 онд байгуулсан гал зогоох энхийн гэрээгээ цуцалснаас хоёр орны харилцаа хурцадмал байдалд ороод байгаа юм. Хойд Солонгос улс өнгөрсөн арван хоёрдугаар сард пуужин хөөргөж, дараа нь хоёрдугаар сард цөмийн туршилт хийснээс НҮБ-ын шинэ хориг арга хэмжээтэй нүүр тулгараад байгаа билээ.