Польшийн баруун хэсгийн доод Силезияд газар хөдлөлт болсны улмаас “Рудна” зэсийн уурхайн туннель нурж, 18 уурхайчин нурангид даруулжээ. Албаныхны мэдээлснээр уурхайчид газрын гадаргаас 600 метрийн гүнд дарагдсан байна. Одоогоор уурхайчдыг аврах ажиллагаа үргэлжилж байгаа ч их хэмжээний том хад, чулуу уурхайн амыг тагласан байгаагаас аврах үйл явц удаашралтай байгаа аж. Түүнчлэн 600 мерийн гүнд дарагдсан уурхайчидтай холбоо тогтоох боломжгүй байгаагаас тэднийг амьд байгаа эсэхийг мэдэх боломжгүй байгаа юм байна.

Үүнээс өмнө Польшид 2006 онд нүүрсний уурхайд дэлбэрэлт болсны улмаас 23 хүн амь үрэгдсэн харамсалтай осол гарч байжээ.

Польшид олон тооны уурхай байдгийн ихэнх нь аж үйлдвэржсэн Силезия бүс нутагт оршдог аж.