Монгол Улсаас Шведийн Вант улсад суугаа Элчин сайдын гэргий Д.Оюунбилэг дипломат корпусын эмэгтэйчүүдийн клубын гишүүдээ “Өглөөний цай”-нд урьж, монгол ноолуураа сурталчилсан байна. Өчигдөр Шведийн Стокгольм хотноо болсон “Өглөөний цай”-ны хүлээн авалтыг “Монгол-ноолуурын эх орон” сэдвийн доор зохион байгуулж, монголын брэнд болсон ноос ноолууран бүтээгдэхүүнийг сурталчилсан төдийгүй Монголын эдийн засгийн байдлын талаар танилцуулжээ. Мөн үеэр Стокгольм хотноо шинэ тутам нээгдсэн “O&L Cashmere Fashion” дэлгүүртэй хамтран “Говь”, “Гоёо” брэндийн ноолууран эдлэлийн загварын үзүүлбэр үзүүлж, ноолууран бүтээгдэхүүний үзэсгэлэн худалдаа зохион байгуулсан нь гадаадын элчин сайдын гэргий нарт ихээхэн таалагдсан байна.

Түүнчлэн энэ сарын 30-ны өдөр Монгол Улсаас Шведийн Вант улсад суугаа ЭСЯ, Швед дэх Монголчуудын үндэсний холбоо, МЗХ-ны Швед дэх салбар зөвлөл хамтран “Швед дэх Монголчуудын өдөрлөг”-ийг зохион байгуулахаар болжээ.