“Монгол эмэгтэйчүүд бизнест-2013” чуулган саяхан Брюсель хотноо болж өндөрлөжээ. Энэхүү чуулганыг хоёр жил тутамд Европ дахь “Монгол эмэгтэйчүүдийн хөгжлийн холбоо”-ноос зохион байгуулж заншжээ. Монгол Улс болон Европ тивд бизнес эрхэлж буй монгол эмэгтэйчүүдийн бизнесийн сүлжээг бий болгох, тэдний бизнесийн харилцаа, үр ашигтай хамтын ажиллагааг өрнүүлэхэд дэмжлэг үзүүлэх, бизнес эмэгтэйчүүдийн түншлэлийг бий болгох, ажлын арга барил, туршлагаасаа хуваалцах боломжийг олгодог юм. “Монгол эмэгтэйчүүд бизнест-2013” чуулганд оролцогч эмэгтэйчүүд  Брюссель хот дахь Европын Парламентын төв байр болон Миланы Хөрөнгийн бирж дээр очсон байна. 

Европын парламент дэх Төв Ази болон Монголын асуудлыг хариуцсан Тэргүүн ноён Паоло Бартолоззитэй уулзаж, Монголын бизнес эрхлэгч эмэгтэйчүүд  үйл ажиллагаагаа   өргөжүүлэх сонирхолтой байгаагаа илэрхийлжээ. Чуулганы хүрээнд “Монгол эмэгтэйчүүдийн бизнес санаанууд” сэдэвт нээлттэй хэлэлцүүлэг зохион байгуулж, хэлэлцүүлэгт Милан дахь Монгол улсын Өргөмжит консул хатагтай Ц.Ганчимэг болон Монголын оюутан залуус оролцсон байна. Чуулганы төгсгөлд Европ дахь “Монгол эмэгтэйчүүдийн хөгжлийн холбоо”-ны удирдах зөвлөлийн гишүүн М.Золжаргал ирэх зургадугаар сарын 1-ний өдөр, эх үрсийн баяраар “Европ дахь оны шилдэг эмэгтэй-2013”-г шалгаруулна гэдгээ нийтэд зарлажээ.