АНУ-ын Калифорн мужийн Индиан Уэллст ATP болон WTA-ийн “BNP PARIBAS OPEN” тэмцээн гуравдугаар сарын 7-17-ны хооронд болж өнгөрлөө. Тус тэмцээнд АНУ-ын Серена Уильямсийг эс тооцвол олон улсын теннисний холбооны шилдэг тамирчид бүгд хүрэлцэн ирсэн.

Тэмцээний эрэгтэйчүүдийн шигшээд Испаний Рафаэль Надаль Аргентиний Хуан Мартин дел Потро нар шалгарахад Надалийн (4:6, 6:3, 6:4) ялалтаар өндөрлөжээ. Надаль шигшээд хүрэхдээ Швейцарийн Рожер Федерер, Чехийн Томаш Бердых нарын шилдгүүдийг буулган авсан байна. Өнгөрсөн жил бэртлийн улмаас “Уимбльдон”-ы хоёрдугаар тойргоос тэмцээнийг орхиж байсан Рафаэль Надаль энэ оны хоёрдугаар сараас теннисний талбайдаа эргэн ирсэн. Тэрбээр Чилийн тэмцээнд финалдаж, Бразил, Мехсикийн тэмцээнүүдэд түрүүлээд байсан бөгөөд Индиан Уэллст түрүүлснээр нэг сая ам.доллар хүртэж, чансааны 1000 оноо хүртлээ. Надаль тус тэмцээний 2007, 2009 оны түрүүг авч байсан байна.

Эмэгтэйчүүдийн шигшээд ОХУ-ын Мария Шарапова, Данийн Каролина Возняцки нарын шилдгүүд шалгарахад тэмцээний хоёрт эрэмбэлэгдсэн Шараповагийн ялалтаар өндөрлөв. Шарапова шигшээ шалгарахдаа Италийн Сара Эррина, нутаг нэгт Мария Крилленко нарыг буулган авснаар Возняцкитай оноолт таарчээ. Дэлхийн экс тэргүүн теннисчин Возняцки тус тэмцээний наймд эрэмбэлэгдсэн бөгөөд Беларусын Виктория Азаренка (1), Германы Кербер (4) нарыг буулган авснаар шигшээд Шараповатай таарчээ. Шарапова Возняцкиг 6:2, 6:2-ийн харьцаагаар хоёр үеийн турш илүүрхсэнээр энэ оны анхны түрүүгээ хүртэж байна. 

ATP болон WTA ангилалын дараагийн “Sony Ericsson Open” тэмцээн АНУ-ын Флорида мужид гуравдугаар сарын 17-30-ны өдрүүдэд болно.