Монгол Улсын Ерөнхийлөгчийн ивээл дор зохион байгуулагдаж буй 7 дахь удаагийн “Дуулиан-2020” тэмцээний хэсгийн сүүлийн тоглолтууд өнгөрсөн амралтын өдрүүдэд явагдлаа. Нийт 74 тоглолт явагдсанаас 70 тоглолт хувиарийн дагуу явагдаж, харин 1-р сургуулийн 4 тоглолт хойшлогдсон байна.

Багууд өнгөрөн долоо хоногт шөвгийн тоглолтонд үлдэх эсэхээ шийдвэрлэсэн чухал тоглолтуудыг хийлээ. Ингээд нийт 54 сургуулийн 202 багийн 3000 орчим тамирчид 6 насны ангилалаар “Дуулиан-2020” 7 дахь удаагийн тэмцээнд оролцсоноос одоогоор нийт 110 багийн 1500 орчим тамирчид шөвгийн тоглолтонд шалгарч үлдээд байна. Үүнд: хөвгүүдийн 13, 15, 17 насны ангилалд тус бүр 1 болон 2-р байраар шалгарсан 26 баг, хөвгүүдийн 11 насны ангилалд 16 баг, харин охидын 15насны багаас 8 шилдэг баг тус тус шалгарсан бол охидын 17 насны ангилалд 6 баг 1 болон 2-р байраар шалгарсан бол ТЗБК-оос 3-р байраар шалгарсан үзүүлэлт сайтай 2 багийг охидын 17 насны ангилалд дараагийн шатанд нэмж үлдээхээр болжээ. Энэ 2 багаар ХСХТТөв болон “Хасу Мегаватт” ХХК-ийн ивээн тэтгэсэн 10-р сургуулиуд шалгарлаа.

Өнгөрсөн амралтын өдрүүдэд явагдсан нийт 70 тоглолтонд 566 гоол орсон байна. Эзэн зочин багийн харьцаа 312:254 байна. Одоогоор долоо дахь удаагийн “Дуулиан-2020” тэмцээнд нийт 1999 гоол ороод байгаа нь удахгүй 2000 дахь гоолийн эзэн тодрох мөч ойртоод байна гэсэн үг.

Ингээд нас насны ангилалд шөвгийн тоглолтонд шалгарсан багуудад баяр хүргэж дараагийн шатны сугалаа болох гуравдугаар сарын 25-ны Даваа гаригийн өдрийн 14,00 цагаас СБД-ийн 2-р сургуулийн хурлын танхимд шөвгийн тоглолтын сугалааны үйл ажиллагаанд урьж байна.

Хөвгүүдийн 13, 15, 17 насны ангилалын багууд шөвгийн 16-д үлдэхийн тулд нэмэлт 1 тоглолтыг хийх ба үүнээс нас тус бүрт 6 баг нь гоц мөргөж, харин бусад 20 баг нь сугалаа сугалж оноолтоор хоорондоо хариу тоглолтгүй цорын ганц тоглолт хийж шөвгийн 16-ийн эрхээ авах юм.

Одоогоор хэсгийн тоглолтоо амжилттай хийсэн сургуулиудаас дурьдвал: БГД-ээс ХасБанкны 40-р сургууль нь 4 насны ангилалаар оролцож бүгд шөвгийн тоглолтонд шалгарч үлдсэн байна. Харин “Онч Аудит” ХХК-ийн 28-р сургууль нь  гурван насаар оролцож мөн л бүгд дараагийн шатанд үлдэж чадлаа.

БЗД-ээс хамгийн амжилттай тоглосон баг бол МИГ Даатгалын 92-р сургууль юм. Тэд хамгийн олон баг болох 6 насны ангилалаар оролцож, улмаар бүгд хэсгийн тоглолтоо амжилттай дуусгаж шөвгийн тоглолтонд тоглох эрхтэй болсон байна. Харин хамгийн холоос оролцож байгаа Бага Хангай цогцолбор сургууль болон Чандмань цогцолбор сургуулийн оролцож байгаа бүх багууд дараагийн шатанд үлдлээ. Мөн СБД-ээс ХасБанкны 2-р сургуулийн гурван баг маш амжилттай тоглож бүгд шөвгийн тоглолтонд үлдэж чадсан. Харин Худалдаа Хөгжлийн Банкны 1-р сургууль нь хойшлуулсан  дөрвөн тоглолтоо маргаашийн 16,00 цагт өөрийн талбай дээрээ хийж, улмаар бүх багууд нь хожих юм бол бүгд дараагийн шатанд үлдэх боломжтой юм.

Чингэлтэй болон СХД-үүд нийлж хэсэгтээ тоглосон ба энэ дундаас Саммит ХХК-ийн 24-р сургууль болон Сэлэнгэ Пресс ХХК-ийн 5-р сургуулиуд 100%-ийн амжилттайгаар дараагийн шатны сугалаандаа оролцох эрхтэй боллоо. Ингэснээр энэ хоёр баг маань аль аль насны ангилалдаа хүчтэй өрсөлдөгч гэдгээ харуулж чадлаа.

Шөвгийн 16 болон нэмэлт тоглолтуудын сугалааны үйл ажиллагаа гуравдугаар сарын 25-ны өдөр 14,00 цагаас СБД-ийн 2-р сургуулийн хурлын танхимд явагдах юм. Илүү дэлгэрэнгүй мэдээлэл болон нас насны ангилалын хуваарь, тоглолтын үр дүнг www.duulian2020.mn гэсэн вебсайт болон “Дуулиан-2020” тэмцээний FACEBOOK болон TWITTER хуудаснуудаас авах боломжтой.