Засгийн газрын ээлжит хуралдаан өнгөрөгч бямба гаригт /03.16/ боллоо. Тус хурлаар “Алтанбулаг-Улаанбаатар-Замын-Үүд” чиглэлийн хурдны авто зам төслийн концессын гэрээний хэлэлцээ хийхийг Эдийн засгийн хөгжлийн сайд Н.Батбаярт зөвшөөрч, гэрээний төслийг Засгийн газрын хуралдаанд танилцуулж батлуулахыг үүрэг болгосон байна.

Барилга хот байгуулалтын яамнаас санаачлан хэрэгжүүлсэн “Шинэ бүтээн байгуулалт” хөтөлбөрийн хүрээнд хийгдэж байгаа Алтанбулаг-Улаанбаатар-Замын-Үүд чиглэлийн хурдны замын ажил ирэх тавдугаар сарын 1-ээс эхэлж, 2015 оны аравдугаар сард дуусна. 2.5 жилд багтаан дуусгахын тулд замын ажлыг нэгэн зэрэг эхлүүлэх төлөвлөгөөтэй байгаа аж. Төслийн гүйцэтгэгчээр “Чингислэнд деволопмент” групп шалгарсан бөгөөд энэ группт “Магнай трейд”, “Жаст”, “Насны зам”, Монинжбар”, “Цаст Импекс” зэрэг арав гаруй компани багтсан байна.

Төслийн нийт өртөг 3.5 тэрбум ам. доллар. Нэг километр автозамыг 3.5 сая ам.доллароoр тавихаар тооцоолжээ.

Хурдны зам Европ стандартаар олон улсад хүлээн зөвшөөрөгдсөн бүтээн байгуулалт болгохын тулд АНУ, Итали улсын төлөөлөгчдийг урьсан байна.