Францын Тэргүүн хатагтай асан Карла Брунигийн шинэ дууны талаар Францын хэвлэлүүд шуугих болжээ. Түүний нэгэн дуунд өнөөгийн ерөнхийлөгч Франсуа Олландыг егөөдсөн утга санаа байгаа гэнэ.

Францын ерөнхийлөгчийн сонгуулийн сунгаанд Олландтай өрсөлдсөн Николя Саркозийн эхнэрийн дуулсан дуунд муухай ч биш, сайхан ч биш, өндөр ч биш, намхан ч биш оцон шувууны тухай дуулж, “Дулаахан ч биш, хүйтэн ч биш, тийм ч биш, үгүй ч биш” хэмээн дуулдаг гэнэ.

Сонгуулийн сурталчилгааны үеэр Олландыг “тийм ч биш, үгүй ч биш ноёнтон” гэж нэрлэж байсан юм.

Карла Бруни шинэ цомгоо ирэх сарын 1-нд албан ёсоор танилцуулах бөгөөд цомгийн зарим дуунууд хэдийнэ сонсогчдын хүртээл болжээ. Дуучин бүсгүй өөрөө улс төрийн шоглол хийгээгүй, зүгээр л өөрт нь ойлгомжгүй “хүмүүжил муутай, тааламжгүй хүмүүст” зориулсан гэлээ.