Өчигдөр болсон Эхний тоглолт “Эрдэнэ дрийлинг Ригс” болон “СБЛ Шаркс” багуудын хооронд боллоо. “Эрдэнэдрийлинг Ригс” багийн ахлагч Н.Золжаргал энэ тоглолтонд багтайгаа эргэн нэгдэж, гараанд гарсан. Харин сүүлийн 5 тоглолт дараалан хожигдоод байсан “СБЛ Шаркс” гарааны бүрэлдэхүүнээ өөрчилж, Б.Өнөрбат, З.Доржсүрэн, Б.Энхманлай, Б.Буянтүмэн, О.Доржзовд нарыг гаргасан. Тэд ч эхний үед тун дажгүй тоглож, Б.Энхманлай 8 оноо авсан. Харин “Эрдэнэдрийлинг” багаас эхний үед Дэн Хэдли багаа тэргүүлж, 12 оноо авсан. Ингэснээр эхний үеийг Ригс 26-23-р илүүрхсэн.

Тоглолтын 2-р үе ч мөн тэнцүүхэн өрсөлдөөнтэй өрнөсөн. Ялангуяа “СБЛ”-ын легионерууд болох Аарон Халл хаяж, Девон Кларк тохсон нь тоглолтын онцгой хэсгүүдийн нэг байсан. Мөн Ригсийн Дэн Хэдлигийн оновчтой шидэлтүүд үргэлжилсэн. Ингэснээр эхний хагас 54-54-р тэнцээгээр өндөрлөсөн.

Харин тоглолтын 3-р үед “Эрдэнэдрийлинг Ригс” оноог бага холдуулж эхэлсэн. Ялангуяа Маркус Скиннер, Н.Золжаргал нар тун идэвхитэй тоглосон. Улмаар энэ тоглолтод Маркус Скиннер 33 оноо, 11 самбар, Дэн Хэдли 30 оноо, Н.Золжаргал 17 оноо, 8 самбар, С.Өрнүүнбилэг 11 оноо, 11 самбар авчээ. Ингэснээр “Эрдэнэдрийлинг Ригс” 105-95-р хожиж, 7-4 гэсэн амжилттай боллоо.

Харин лигийн тун өнгөтэй эхлүүлж байсан СБЛ Шаркс сүүлийн 6 тоглолт дараалан хожигдож байна. Тэднээс Девон Кларк 21 оноо, 10 самбар, М.Мөнхтөр 18 оноо, Аарон Халл 13 оноо, З.Доржсүрэн 11 оноо, О.Сэргэлэн 7 оноо, 8 оновчтой дамжуулалт өгчээ. Тэд ингэснээр 4-7 гэсэн амжилттай боллоо.

Дараагийн тоглолт супер лигийг тэргүүлж байгаа “Танан гарьд” болон “Буллз” багуудын хооронд болсон. “Танан гарьд” багийн хувьд дараалсан тоглолтуудыг хийж байгаа учир гарааны бүрэлдэхүүнээ өөрчилсөн байлаа. Харин Буллзын хувьд энэ тоглолтонд хожвол, Гарьдуудтай ижил амжилттай болох байсан.

Лигийг тэргүүлж байгаа багуудын тоглолтын эхний үед “Баянзүрх буллз” илүү тоглолтыг гаргасан. Тэд эхний үед 4 холын зайн шидэлтийг амжилттай болгож, 28-13-р илүүрхсэн. Харин 2-р үеэс “Танан гарьд”-ууд оноог ойртуулахыг хичээж байсан ч, Т.Санчирын тоглолтыг зогсоож чадахгүй байлаа. Т.Санчир энэ өдөр гайхалтай тоглолтуудынхаа нэгийг гаргаж, тоглолтын эхний хагаст 32 оноо авч, 4 холын зайн шидэлтийг амжилттай болгосон. Ингэснээр эхний хагас 55-44-р “Буллз”-ын давамгайллаар өндөрлөсөн.

Тоглолтын 3-р үе тун ширүүн өрсөлдөөнтэй өрнөж, Фредрик Вүүдс, Ц.Азбаяр, О.Ууганбаяр нарын ээлж дараалсан довтолгоо амжилттай болсоноор, оноог 67-67 болгон тэнцүүлсэн. Гэсэн ч 3-р үеийн сүүлийн 3 минутанд “Буллз” 11 оноо дараалан авсанаар, 80-69-р 3-р үеийг өндөрлүүлсэн.

4-р үед ч “Буллз”-ын сайн тоглолт үргэлжилсэн. Т.Санчир 2 дараалсан гоё оролтыг энэ үед хийсэн. Т.Санчир энэ тоглолтонд нийт 48 оноо, 8 самбар авч, ээлжит гайхалтай тоглолтоо гаргалаа. Мөн Декори Жонес 4-р үед тэсрэлттэй тоглогч гэдгээ нотолж, 3 дараалсан гайхалтай тохолт хийж, үзэгчдийг хөөргөсөн. Тэрээр тоглолтонд нийт 16 оноо, 9 самбар авчээ. Мөн Д.Мөнхтүвшин 4-р үед 12 оноо авсан. Тэрээр энэ тоглолтонд нийт 25 оноо, 10 оновчтой дамжуулалт, 5 бөмбөг таслалт хийжээ. Ингэснээр тоглолт 115-93-р Баянзүрх Буллзын ялалтаар өндөрлөж, тэд Гарьдуудыг 2 дахиа буулган авлаа. Мөн 2 багууд 7-3 гэсэн ижилхэн амжилттай болж байна.

Харин “Танан гарьд” багийн долоо дараалсан хожлын цуврал зогсож байна. Тэднээс Ц.Азбаяр 27 оноо, Вүүдс 22 оноо, О.Ууганбаяр 22 оноо авчээ.

Үндэсний супер лигийн тоглолтууд маргааш “Энержи ресурс харцага” болон “СБЛ Шаркс”, Эхлэл “МБМ” болон “Танан гарьд” багуудын тоглолтоор үргэлжлэн явагдана.

Гэрэл зургийг ЭНД дарж үзнэ үү

Д.ЛХАГВА