Хятадын Шанхай хотын Хуанпу голоос сүүлийн хэдэн өдрийн турш олон мянган үхсэн гахай олдож, байгаль орчин, эрүүл ахуйн аюулын “харанга дэлджээ”. Шанхайн ундны гол эх үүсвэр болсон Хуанпу голд үхсэн гахайн тоон бараг 6000-д хүрсэн тухай Синьхуа агентлаг мэдээлжээ. Хятадын албаныхны мэдээлснээр өчигдрийн байдлаар Хуанпу голоос 5916 үхсэн гахайг зайлуулаад байгаа юм байна. Байгаль орчны албанаас хийсэн судалгаа, шинжилгээгээр олон мянган гахайн үхсэн шалтгаан нь голын уснаас хамааралгүй гэдгийг олж  тогтоосон тухай ВВС мэдээлжээ. Тэдгээр үхсэн гахайг Цясин хотын гахайн фермээс авчирсан байж болзошгүй гэнэ. Лабораторийн шинжилгээгээр зарим үхсэн гахайнаас хүнд халддаггүй гахайн халдварт өвчний вирус илэрсэн байна.

Хятадын Засгийн газрын албаныхан гахайн үхсэн шалтгааныг тодруулахаар ажиллаж байгаа бөгөөд Хуанпу голын ус аюулгүй гэж мэдэгдсэн нь олон нийтийн дургүйцлийг төрүүлээд байгаа аж. Сүүлийн өдрүүдэд энэ тухай мэдээлэл Хятадын “Weibo” зэрэг олон нийтийн сайтад дуулиан дэгдээж, олон сая хүн Засгийн газарт дургүйцлээ илэрхийлжээ. Шанхайн иргэдийн үзэж буйгаар  олон мянган гахай үхсэн голын уснаас уух нь яавч аюулгүй бус, энэ бол Засгийн газрын хүмүүсийг мунхруулах гэсэн оролдлого гэнэ. Түүнчлэн Хятадын жиргээчид Засгийн газраас голын ус бохирдсон бол энэ тухай үнэн мэдээлэл өгөх ёстой хэмээн шаарджээ.

Хятадад сүүлийн үед байгаль орчны асуудал хурцаар тавигдаж байгаа бөгөөд агаарын бохирдол, замын түгжрэл, хүн амын хэт төвлөрөлт гэх мэт асуудлууд байнга яригдах болжээ.