Математикийн тогтмол π тооны баярыг дэлхий даяар жил бүрийн гуравдугаар сарын 14-нд зохион байгуулдаг болоод удаж байна. Хэдийгээр π тоо нь төгсгөлгүй үргэлжлэх иррациональ тоо боловч дэлхий дахинд тус тооны эхний 3 цифр буюу 3.14-ийг хамгийн түгээмэл ашигладаг. Иймээс олон улсын π /pi/ тооны баярын өдрийг гуравдугаар сарын 14-ний өдөр тэмдэглэж иржээ.

Манай орны хувьд өнгөрсөн жилээс ШУТИС-ийн эрдэмтдийн зүгээс санаачлан π тооны өдрийг жил бүр уламжлал болгон зохион байгуулахаар болсон байна. Энэ талаар маргааш ШУТИС-ийн төв байранд 13 цаг 59 минутанд /3,14159…/ Монголын оюун ухааны академийн захирал Х.Хатанбаатар, “Хүн хуанли” төрлийн дэлхийн болон оюуны олимпийн аварга Т.Мягмарсүрэн нар π тооны таслалаас хойш 2000 оронг нэрлэхээс гадна хэрхэн тоон мэдээлэл цээжлэх аргачлалын талаар лекц уншина.