Сайд нарын гэх хоёрдугаар эмнэлэгт эмчүүлж байгаа хоригдол Н.Энхбаярын эхнэр О.Цолмон МАХН-ын Гүйцэтгэх хорооны гишүүдэд захидал илгээжээ. МАХН-ын гүйцэтгэх хороо гэдэг нь МАН-ынхаар бол намын Удирдах зөвлөл, бодлого тодорхойлох хэсэг. О.Цолмонгийн МАХН-ын Гүйцэтгэх хорооны гишүүдэд хаяглан хэвлэл мэдээллээр цацсан уг захидалд тэдгээр хүмүүсийг ажил албан тушаалд очиход тусалсан, дэмжиж хамгаалсан Н.Энхбаярын ач тус, хүч хөдөлмөрийг дахин сануулж, түүнийг өвчний учир ялаас чөлөөлүүлэх ажлыг яаравчлан хөөцөлдөхийг хүссэн байна. Тэр эмэгтэй мөн нөхрийнх нь бие нэгдсэн хоёрдугаар эмнэлэгт эмчлүүлж эхэлснээс хойш улам дордож байгааг анхааруулж, өвчний оношийг тодруулахад Монголын эмнэлэг, эмч нарын бэлтгэл хангалтгүй байгаа тул гадаадад явуулж эмчлүүлэх хэрэгтэй гэсэн байна.

Харин О.Цолмонгийн энэ шаардлагын хариуг Хууль зүйн сайд Х.Тэмүүжин өнгөрөгч долоо хоногт сэтгүүлчидтэй хийсэн уулзалтынхаа үеэр өгсөн билээ. “Н.Энхбаярын гэр бүл болоод намынхан түүнийг ялаас чөлөөлж, гадаадад эмчлүүлэхийг шаардаж байгаа. Хуулийн ийм боломж бий юу?” гэсэн асуултад Хууль зүйн сайд,

– Ял эдэлж байгаа ялтан, хоригдлыг хил дамнуулан эмчлүүлэх боломж, эрх зүйн акт манайд байхгүй. Өөр бусад оронд ч ийм жишиг байдаггүй. Харин ялаас чөлөөлөх асуудал бол хууль журмаараа зохицуулагдсан байгаа. Н.Энхбаярын өвчний онош ялаас чөлөөлөгдөх өвчний жагсаалтад багтсан байвал ялаас чөлөөлөх боломжтой” хэмээн хариулсан юм. Ялаас чөлөөлөх өвчний жагсаалтад одоогоор 18 өвчнийг нэрлэсэн байдаг бөгөөд үндсэндээ эмчлэгдэх боломжгүй, өвчний эцсийн шатанд орсон үед нь ялаас чөлөөл заалттай байдаг аж. Харин Н.Энхбаярын хувьд биеийн байдал болоод өвчний онош нь энэ жагсаалтад багтаагүй байгаа бололтой.