Монгол Улсын Ерөнхийлөгчийн ивээл дор 7 дахь удаагаа зохиогдож байгаа “Дуулиан-2020” тэмцээний хэсгийн хоёр дахь тоглолтууд өнгөрсөн долоо хоногт боллоо.

Өнгөрсөн амралтын өдрүүдэд нийт 77 тоглолт явагдах байснаас 75 тоглолт явагдаж, хоёр тоглолт хойшлогдсон байна.

Чандмань цогцолбор сургууль болон Бага Хангай цогцолбор сургуулиудын хоёр тоглолт энэ долоо хоногт тоглогдохоор болжээ.

Нийт 75 тоглолтонд 750 гоол орсноос эзэн, зочин багийн харьцаа нь 438:312 байлаа. Мөн одоогоор нийт 1442 гоол орсон байна гэдэг нь долоо дахь удаагийн “Дуулиан-2020” тэмцээний 1000 дахь гоолын эзэн өнгөрсөн долоо хоногт тодорлоо. МИГ Даатгалын 92-р сургууль болон ХасБанкны ивээн тэтгэсэн 102-р сургуулийн 17 насны ангилалын тоглолтын үеэр тодорсон байна. Энэ тоглолт гуравдугаар сарын 9-ны өдөр 92-р сургуулийн талбай дээр болсон. Тоглолтын эхний үеийн долоо дахь минутанд 102-р сургуулийн  6 дугаартай тоглогч Өлзийбаатар овогтой Бямбацогт тухайн тоглолтын багийнхаа анхны гоолыг хийснээр энэ жилийн тэмцээний 1000 дахь гоолын эзнээр тодорлоо. Бямбацогт энэ тоглолтонд 2 гоол хийсэн ч баг нь 8:3-р хожигдол хүлээжээ.

Хамгийн олон гоол орсон тоглолтоор Тэнгэр Даатгалын ивээн тэтгэсэн 29-р сургууль болон ХасБанкны 2-р сургуулиудын 17 насны ангилал тоглолт тодорлоо. Энэ тоглолтонд зочин багаар тоглосон 2-р сургууль 16:8-р хожсоноор нийт 24 гоол нэг тоглолтонд орлоо. Одоогоор 2-р сургууль нь хэсгээ 2 хожил 6 оноотойгоор тэргүүлж байна.

Энэ долоо хоногийн Баасан гаригт буюу гуравдугаар сарын 8-ны өдөр Олон Улсын Эмэгтэйчүүдийн эрхийг хамгаалах өдөр тохиолдсон ба энэ өдөр Саммит ХХК-ийн 24-р сургуулийн талбайд 4 тоглолт явагдсанаас, эзэн багаар тоглож байсан 24-р сургууль 4 насны ангилалд эсрэг багтаа ямар ч боломж өгөлгүйгээр илт давуу буулгаж авсан байна. Ингэснээр 24-р сургууль нь энэ жилийн тэмцээнд бүх насны ангилалд бэлтгэл сайтайгаа улам батлаад байна.

Мөн өнгөрсөн долоо хоногт бүх насны ангилалдаа ноёрхсон сургууль бол БЗД-ийн МИГ Даатгалын ивээн тэтгэсэн 92-р сургууль юм. Тэд гуравдугаар сарын 9-ны өдөр 6 тоглолт талбай дээрээ хүлээж авч, улмаар бүгдэд нь ялалт байгуулсан байна.

Хэсгийн гурав дахь тоглолтууд буюу сүүлийн шийдвэрлэх тоглолтууд гуравдугаар сарын 16-17-ны өдрүүдэд явагдах ба 17-ны орой гэхэд бүх насны ангилалын шилдэг 32 ба тодрох ажээ. Шөвгийн тоглолтуудын сугалааны үйл ажиллагаа гуравдугаар сарын 20-ны өдөр 14,00 цагаас СБД-ийн 2-р сургуулийн хурлын танхимд явагдах юм.

Мөн тэмцээний шөвгийн тоглолтууд Хан-Уул Дүүргийн БТСЗааланд төвлөрч тоглох юм.

Тэмцээний нийт шагналын сан 35 сая төгрөг байх ба үүн дотор шилдэгийн шилдэг сургууль нь гурван сая төгрөгөөр шагнуулах юм. 

Илүү дэлгэрэнгүй мэдээллийг www.duulian2020.mn болон FACEBOOK, TWITTER хуудаснуудаас авах боломжтой ба 99851029, 95862016, 99500214 гэсэн дугааруудаас лавлах боломжтой.