Монгол Улсад 300 гаруй хувьцаат компани бүртгэлтэй байдгаас 215 орчим нь байнгын идэвхтэй үйл ажиллагаа явуулдаг. Компанийн засаглалын тухай хуулинд заасны дагуу дээрх бүх хувьцаат компаниуд жил бүрийн хоёрдугаар сарын 10-ны дотор санхүүгийн тайлангаа Санхүүгийн зохицуулах хороо болон Монголын хөрөнгийн биржид өгөх ёстой байдаг аж. Гэтэл одоогийн байдлаар 94 компани л санхүүгийн тайлангаа ирүүлээд байгаа аж. Тиймээс ойрын хугацаанд компаниуд санхүүгийн тайлангаа ирүүлэхгүй бол Санхүүгийн зохицуулах хорооноос Компанийн тухай хуулинд зааснаар тухайн компанийн эрх бүхий албан тушаалтанд хөдөлмөрийн хөлсийг 20 дахин нэмэгдүүлсэнтэй тэнцэх мөнгөн торгууль ногдуулахыг анхааруулж байна. Тодруулбал, санхүүгийн тайлангаа ирүүлээгүй компанид бус, удирдах ажилтанд нь хариуцлага тооцох буюу удирдах ажилтны хувийн орлогоос торгох гэнэ.

Түүнчлэн компанийн засаглалын тухай сургалтад компаниудын удирдах ажилтнууд яаралтай хамрагдаж, тавдугаар сарын 1-нээс өмнө хувь нийлүүлэгчдийн хурлаа хийсэн байх ёстой аж. Хувь нийлүүлэгчдийн хурлын товыг хурал болохоос 45 хоногийн өмнө Санхүүгийн зохицуулах хороо, Монголын өрөнгийн бирж болон олон нийтэд зарлах хэрэгтэй юм байна.

Ийнхүү хувь нийлүүлэгчдийн итгэлийг даасан хувьцаат компаниуд санхүүгээ үнэн зөв, ил тод тайлагнах нь тухайн компани шударга, тогтвортой, сайн засаглалыг бүрдүүлснийг батлах бөгөөд цаашдаа энэ байдлаар хөрөнгө оруулагчдыг татах, үйл ажиллагаагаа тэлэх боломжийг олгох тухай эдийн засагчид тайлбарладаг билээ.