Хойд Солонгосын зүгээс 1953 онд Өмнөдтэй байгуулсан гал зогсоох гэрээгээ цуцална хэмээн сүрдүүлсний хариуд Өмнөд Солонгосын албаныхан хойд хөршийнхөө эсрэг хариу сүрдүүлсэн мэдэгдэл хийжээ. Өмнөд Солонгосын армийн генерал Ким Ён-Хюн “Өмнөд Солонгос улс Хойд Солонгосын аливаа өдөөн хатгалга, сүрдүүлгийн эсрэг зохих хариу арга хэмжээ авч, хэрэв тус улсын иргэний амь нас эрсдэх аваас хатуу өш хонзон авна” хэмээн сүрдүүлсэн байна.

Хойд Солонгос улс нь өнгөрөгч оны арванхоёрдугаар сард пуужин хөөргөж, дараа нь хоёрдугаар сард дахин цөмийн туршилт хийснийхээ төлөө ирэх 11-ний өдрөөс эхлэн олон улсын шинэ хориг арга хэмжээтэй нүүр тулах болоод байгаа юм. НҮБ-ын Аюулгүйн зөвлөл дэх АНУ-ын төлөөлөгч Сюзан Райсын мэдээлснээр ирэх долоо хоногоос  Хойд Солонгосын эсрэг авч хэрэгжүүлэх шинэ хориг арга хэмжээ нь тус улсын дипломатууд болон бэлэн мөнгөний гуйвуулгын эсрэг чиглэх аж. 

Харин үүний хариуд Хойд Солонгос Өмнөдтэй байгуулсан гал зогсоох гэрээгээ цуцалж, хэзээ ч, ямар ч улс руу дайралт хийхэд бэлэн буйгаа мэдэгджээ.

Хоёр Солонгос 1950-1953 оны хооронд үргэлжилсэн дайны дараа гал зогсоох гэрээ байгуулсан юм.