Дэлхийн РС зах зээлд нөлөө бүхий “Dell” корпораци сүүлийн үед хүчээ авч буй таблет буюу самбаран төхөөрөмжийн зах зээлд хөл тавилаа. РС үйлдвэрлэлээрээ дэлхийн хэмжээнд гуравдугаарт эрэмбэлэгддэг тус компанийн мэдэгдсэнээр “Streak” буюу “Mini 5” таблет нь тус компаниас энэ салбарт хөл тавьж буй анхны бүтээгдэхүүн болон гарчээ.

Streak нь бусад компанийн дийлэнх таблет төхөөрөмжүүдээс жижиг хэмжээтэй, тодруулбал, таван инч /12,5 см/ дэлгэцтэй бөгөөд Google компанийн Android үйлдлийн системтэй аж. Уг таблетийг 2010 оны нэгдүгээр сард болсон Consumer Electronics Show-ны үеэр анх танилцуулсан бөгөөд мэдрэгчтэй дэлгэцтэй Streak нь эхний ээлжинд Америкт, удалгүй Европ, Ази гээд дэлхийн бусад орнуудад худалдаалагдах эхлэх юм байна. Streak таблетын анхны загвар нь 3G, Wi-Fi, GPS-тэй, 16GB багтаамжтайн дээр урд болон ард байрласан хоёр камертай юм. Харин үнийн тухайд хараахан тодорхойгүй байна.

С.Цэлмэг