Дэлхийн өнцөг булан бүрт сая сая үзэгчтэй телевизийн шоунуудын нэг “Авьяаслаг британичууд”-аас мэндэлсэн од Сюзан Бойл кино урлагт хүч үзэхээр шийджээ. Тэрээр 1890-ээд оны Английн нэгэн жижиг тосгоны амьдралыг өгүүлэх “The Christmas Candle" нэртэй кинонд тоглож байгаа гэнэ. Тус кинонд Сюазанаас гадна Британийн нэрт жүжигчин Лесли Менвилл, Шотландын нэрт жүжигчин Жон Ханна, Сюзан Баркс нар мөн хамтран тоглож байгаа ажээ. “The Christmas Candle" энэ оны сүүлээр буюу Зул сарын баярын өмнө үзэгчдийн хүртээл болох тухай кино  багийнхан мэдэгджээ.

2009 оны дөрөвдүгээр сарын 14-нд Английн телевизээр цацагдсан “Авъяаслаг британичууд” шоуны тайзнаа анх хөл тавьсан Сюзан Бойл төдийлөн олны анхаарлыг татаагүй ч дуулж эхэлмэгцээ уярам сайхан дуу хоолойгоор үзэгчдийг, шүүгчдийг бишрүүлж чадсан билээ. Шоуны үеэрх бичлэгүүд цахим ертөнцөд шуугиан тарьж, Сюзан Бойлыг урлагийн шинэ од болох замд хөтөлсөн юм.