Тайландын нийслэл Бангкок хотноо туялзуур сэлэмний Ази тивийн өсвөр, залуучуудын аварга шалгаруулах тэмцээн энэ өдрүүдэд болж байна. Тус тэмцээнд манай улсаас өсвөрийн дөрвөн тамирчин оролцож буй.

Мөн тэмцээний үеэр Азийн туялзуур сэлэмний холбооны хурал болжээ. Тус хуралд Монголын туялзуур сэлэмний холбооны албаны хүмүүс оролцов. Хурлын нэг чухал асуудал бол 2015 оны олон улсын уралдаан тэмцээнийг зохион байгуулах хотуудыг сонгох байлаа. Туялзуур сэлэмний залуучуудын (U 23) 2015 оны Азийн аварга шалгаруулах тэмцээнийг Улаанбаатар хотноо зохион байгуулахаар болсон байна.

Монголын туялзуур сэлэмний холбоо 2009 онд байгуулагдсан бөгөөд өнгөрсөн жил насанд хүрэгчдийн азийн болон Дэлхийн аварга шалгаруулах тэмцээнд оролцож анхны ялалтаа авсан. Мөн туялзуур сэлэмний лигийн тэмцээнийг өнгөрсөн онд зохион байгуулсан бөгөөд энэ жилээс эхлэн тамирчдын дундах чансааг тогтоох тэмцээнийг зохион байгуулж байна.