Хэд хоногийн өмнө зарын сонин уншиж суутал “Үхрийн гараар татсан мах зарна” гэж байна. Хүн мах татахаа байгаад үхрээр татуулдаг болчихсон юм шиг байна. Энэ хүнийг залхуу эсвэл хөдөлмөрч гэж тодорхойлох гэж оролдоод чадсангүй. Үхрээр мах татуулж сургасныг нь бодохоор хөдөлмөрч ч юм шиг, үхрээрээ мах татуулаад өөрөө зүгээр сууж байгааг нь бодохоор залхуу ч юм шиг. Гэхдээ энэ хүн үхрээр мах татуулах санааг анх олсон бүтээлч, шинийг илэрхийлэгч  хүн бололтой. Магадгүй үхрээр мах татуулж сургаснаараа гиннесийн но­мд бичигдэж мэдэх л юм. Бас тэр мах татдаг үхрийг үзэх гэж хүмүүс удахгүй гэрт нь шавах биз. Одоо шавж байгаа ч байж магадгүй.

Ер нь монголчууд юуг ч “монголчлох” чадалтай адтай улс. Гадны өндөр мэдлэг бо­ловсролтой инженерийн бү­тээ­сэн машиныг жирийн нэг монгол залуу монголчлоод хийчихдэг. Үхрийн гараар мах татуулах ч гэсэн монголчлох аргын нэг хэлбэр байх. Олон мянган жилийн туршид тал нутагт дураараа амьдарсан монголчууд дүрэмгүй сэтгэд­гээрээ бусдаас ялгардаг. Бид юуг ч яаж ч хийж мэднэ. Хөл гаргүй дөрвөн туурайтай үхрийг хүртэл хутга бариулж мах татуулж сургасан нь бид­ний дүрэмгүй сэтгэх чадварын илрэл юм.

Хэдийгээр би монгол хүн ч гэсэн үхрээр мах татуулах санааг яаж олсныг гайхаад олохгүй юм. Естой л дүрэмгүй сэтгэдгийн үр дүн байхдаа. Онцгой авьяас, бүтээлч сэтгэ­хүйтэй тэр хүнтэй нэг уулзаж туршлагаас нь хуваалцах юмсан. Үхрээр мах татуулах санааг анх яаж олсон, үхрийг хутга барьж мах татуулахын тулд хэр хугацаа зарцуулсан, мах татаж байгаа үхэр нь монгол үхэр үү, сарлаг юм уу аль эсвэл бүр өөр үүлдрийнх гэдгийг нь мэдмээр байна. Арга барилаас нь суралцмаар байна. Магадгүй хонь, ямаа, бүр мориор ч мах татуулж сургачих ч юм бил үү.

Уншигч та удахгүй хонь, ямааны гараар татсан мах зар­на гэвэл бүү гайхаарай. Үх­рээр мах татуулчихаж бай­гаа юм чинь хонь, ямааг мах татуулаад сургачих нэг их асуудал биш байлгүй дээ. Зөвхөн мах татуулаад зогсохгүй ойр зуурын ажилд сургачихвал ч аятайхан юм байна. За тэгээд цаашилбал нохой, муурыг гэрийн ажилд сургаад авчихмаар байгаа юм.