Хувь хүний хөгжлийн институт нь Засгийн газартай хамтран “Амьдрах ухаан амжилтын хөтөч” хөтөлбөрийг хэрэгжүүлэхээр болж өнгөрсөн долоо хоногт анхны сургалтаа эхлүүлж байсан бол өнөөдөр шинэ бүтээлээ танилцууллаа. “Амьдрах ухаан-Амжилтын хөтөч” нэртэй энэхүү номыг Хувь хүний хөгжлийн инстутын захирал хуульч М.Ичинноров, Аксел Фишер нар бүтээжээ. Хуульч М.Ичинноров бүтээлийнхээ тухай тодотгохдоо “Хүн бүр өөрийн дотоод ертөнцдөө асар их хүч агуулж байдаг. Тэрхүү хүчээ ашиглаж, өөрийгөө нээхэд энэ ном маань монгол хүн бүрт хөтөч болох учиртай. Хэдхэн хоногийн өмнө сургалтынхаа үйл ажиллагааг нээж, нээлтийн үйл ажиллагаанд Ерөнхий сайд оролцож, анхны хонхыг цохиход хүмүүсийн дунд “М.Ичинноров Ардчилсан намд элсээ юм болов уу” гэх ойлголт төрсөн байсан. Би намд элсээгүй, улстөрөөс ангид байж хувь хүнд хүргэх боловсролыг дээшлүүлэхэд өөрийн хувь нэмрийг оруулъя л гэж бодсон. Сургалтад хамрагдаж байгаа залуус маань хичээлээс тарахдаа нүүр дүүрэн инээмсэглэлтэй гарахад миний хувьд хамгийн их аз жаргал ирдэг. Би аз жаргалын төсөл хэрэгжүүлж байна гэж бодохоор баярлахын аргагүй байдаг. Тийм учраас би сургалтаа аз жаргалын хөтөлбөр гэж нэрлэсэн. Ном маань ч бас монгол хүн бүрийг амжилтад хүргэж, аз жаргалтай болгоход нь хөтөч болно. Нийгмээрээ нийтээрээ аз жаргалтай сэтгэл дүүрэн амьдрахад монгол хүн бүр өөрийн дотоод хүчээ нээж, ашиглаж өөрийгөө хөгжүүлэхэд оршиж байгаа юм. Тийм болохоор “Амьдрах ухаан амжилтын хөтөч” номоо монгол хүн бүрт хүргэхийг зорьж байна” гэлээ.

Номын нээлтэд Монголын сэтгүүлчдийн эвлэлийн ерөнхийлөгч Б.Галаарид, Шударга өрсөлдөөн хэрэглэгчийн төлөө газрын дарга О.Магнай нар оролцсон юм. О.Магнай дарга энэ үеэр “Хорин хэдэн настай байхад ийм ном байсан бол би илүү ихийг бодож хийх байжээ” хэмээн номын нээлтэд ирсэн зочдыг хөгжөөгөөд авав. Мөн тэрээр “М.Ичинноровын зохиосон энэхүү ном монгол залуу хүн бүрийн ном байгаасай. Энэ номыг уншсанаар өөрийгөө олоод зогсохгүй залуу хүний зоригийг, хүчийг олоосой. Улс орны хөгжил ямагт хувь хүний хөгжлөөс шалтгаалж байдаг болохоор хүн бүр өөрийнхөө оюун санааг хөгжүүлэх нь эрхэм юм” гэж хэлсэн бол Б.Галаарид “Ийм хэрэгтэй номын нээлтэд цөөхөн оролцож байжээ. Хүн төрлөхтөний гайхамшигтай сайхан ухааныг хамгийн энгийнээр хүн бүрт хүргэнэ гэдэг бас тийм амар зүйл биш. Монголчууд амьдралаас суралцдаг ард түмэн. Ясанд нь ийм суралцахуйн ухаан суусан ард түмэн учраас энэ ном их үнэ цэнээ өгөх болно гэж бодож байна. Монгол Улс 1990 онд оюун санааны асар том хувьсгал хийсэн боловч хувь хүний хөгжлийн асуудлыг үндсэнд нь орхигдуулсан юм. Хэдийгээр өнгөрсөн хугацаанд барууны орнуудын боловсролыг хөгжүүлэхийн төлөөх оролдлогуудыг хийсэн ч асар их зардал гаргасан байдаг. Гэтэл түүнээс өртөг зардлын хувьд бага тусах өгөөжтэй сургалт бас байжээ гэдгийн жишээ бол М.Ичинноров, Аксел Фишер нарын бүтээл, бас хувь хүний хөгжилд анхааран эхлүүлсэн сургалт болж байна” гэдэг бодол төрлөө” гэсэн юм.

Уншиг та “Амьдрах ухаан-амжилтын хөтөч” номтой нөхөрлөснөөр өөрийгөө хөгжүүлэх, дотоод сэтгэлдээ нуугдаж байгаа асар их хүчээ ашиглан аз жаргалтай, орлоготой, сэтгэл хангалуун амьдрах боломжоо нээж олох боломжтой. Учир нь та дэлхийн алдартай хүмүүсийн амжилтад хүрсэн түүхүүдийг уншин, тэмдэглэл хөтөлж, амжилтын зарчмуудыг танин мэдэх мэдээллийг өөртөө авч чадна. Мөн өөрөө өөрийнхөө хүч чадалд итгэх итгэлийг олно. Ном нь гурван бүлгээс бүрдэж байгаа бөгөөд хэсэг тус бүр нь таны өөрийн олж нээсэн дотоод ертөнцийн толь болох юм.