Монгол Улсаас Шинэ Зеланд улсад суух Онц бөгөөд бүрэн эрхт Элчин сайд Р.Болд өчигдөр Шинэ Зеланд улсын Амбан Захирагч Эрхэмсэг ноён Жерри Метапараид “Итгэмжлэх жуух бичиг”-ээ барьжээ. Мөн үеэр Элчин сайд Р.Болд Монгол Улсын Ерөнхийлөгч Ц.Элбэгдоржийн мэндчилгээг Амбан захирагчид уламжлан, Элчин сайдын хувьд хөдөө аж ахуй, боловсрол, соёл, жирийн иргэд хоорондын харилцааг хөгжүүлэхэд шинийг эрэлхийлж Шинэ Зеландын Засгийн газартай нягт хамтран ажиллах эрмэлзэлтэй байгаагаа илэрхийлсэн байна. 

Амбан Захирагч Ж.Матепараи 2011 онд Монголын Хүнс, хөдөө аж ахуйн салбарын төлөөлөгчид Шинэ Зеланд улсад айлчилсан нь хоёр орны хөдөө аж ахуйн салбарын харилцааг эхлүүлэхэд түлхэц болсныг тэмдэглэсэн байна. Түүнчлэн тус улсын Засгийн газраас манай улсын төрийн албан хаагчдыг англи хэлний сургалтанд хамруулж буй хөтөлбөр үр дүнтэй байгааг онцолжээ. Мөн Элчин сайд Р.Болд хоёр талын харилцааны асуудлаар Шинэ Зеланд Улсын Гадаад хэрэг, худалдааны яамны Орлогч нарийн бичгийн дарга хатагтай А.Смит, Шинэ Зеландын Олон улсын Харилцааны Хүрээлэнгийн захирал П. Кеннеди болон албаны бусад хүмүүстэй уулзан санал солилцлоо хэмээн Гадаад харилцааны яамнаас мэдээлэв.