“Гэгээн муза” наадмын драмын жүжгийн төрөлд УДЭТ-ын найруулагч Н.Наран­батаарын бүтээл “Гамлет”, Б.Галааридын бүтээл “Эсрэг дурлал”, Архангай аймгийн ХДТ-ын “Тамын дурлал”, “ТВ Коктель” продакшны “Хоёр ертөнцийн буудал” жүжиг нэр дэвшиж байгаа юм. Драмын жүжгийн төрөлд анх удаа нэр дэвшин өрсөлдөх болсон “ТВ Коктейл” продакшны бүтээлийн талаар жүжигчин Н.Цэнд-Аюушаас тодрууллаа.

-Жүжиг тань нэр дэвшиж байгаад баяр хүргэе?

-Баярлалаа. “ТВ Коктель” продакшн байгуулагдаад 10 гаруй жил боллоо. “Хоёр ертөнцийн буудал” бол манай продакшны хувьд анхны тайзны бүтээл байсан. Театрын шилдгийн шилдгийг шалгаруулдаг хүндтэй наадамд нэр дэвшихээр болсондоо маш их баяртай байна.

-Зургаан төрөлд нэр дэвшиж байгаа гэсэн үү?

-Тийм ээ, най­руулагчаар ажил­ласан Ж.Сэнгэдорж, мөн жүжигчин У.Батхуяг буюу Амбий, Д.Энхбаяр, А.Өнөржаргал болон тайзны зураач О.Баяр­магнай, хөгжмийн зохиолч Г.Онон гээд нийт зургаан төрөлд нэр дэвшиж байгаа.

-Нэр дэвшснээ хэзээ мэдсэн бэ?

-Энэ сарын 20-нд мэдсэн.Маргааш нь нэр дэвших эрхээ театрын урлагийн бурхадаас гардан авсандаа их баярласан. Одоо “Гэгээн муза” наадамдаа бэлтгэх л үлдлээ.

-Шагнал авна гэсэн итгэл хэр их байна вэ?

-Шүүгчид уран бүтээлчдийн ямар зохиол сонгосон, найруулагчийн тавилт, тайзны зураг, шийдэл зэрэг олон зүйлийг харж байж шилдгээ шалгаруулна гэж бодож байна. 

-Хамгийн хүчтэй өрсөлдөгч хэн байх бол?

-Энэ жил драмын жүжиг тайзнаа тавьсан уран бүтээлчидтэйгээ өрсөлдөнө. Олон хүчтэй, чадварлаг найруулагч, жүжигчид өрсөлдөж байгаа учраас бага зэрэг сандарч байна.

-“Хоёр ертөнцийн буудал” жүжиг драмын бусад жүжгээс юугаар онцлог юу вэ?

-Бид орчин үеийн сонгодог зохиолоор жүжиг тавьсан. Жүжгийн зохиолч Э.Шмит бол Европын шилдэг зохиолчийн нэг шүү дээ. Энэ жүжгийн сонголт ч мэдээж оновчтой шийдэл байсан болов уу гэж бодож байгаа. Жүжгээ тоглоход үзэгчид их сайхан хүлээж авсан. Хоёр ч удаа үзэгчдийн хүсэлтээр тоглосон. Тиймээс үзэгчдэд их зүйлийг ойлгуулсан жүжиг болсон юм болов уу гэж бодсон. Мөн бид энэхүү жүжгийг Азидаа анх удаа тавьсан гэдгээрээ бахархаж байгаа.