Хамбын суудлаас татгалзаж, эрх мэдлээсээ буух болсноо албан ёсоор мэдэгдсэн Ромын хамба XVI Бенедикт олон мянган Католик шашинтнуудын тэргүүн байх цаг үеийн хамгийн сүүлчийн залбирал үйлдэх ёслолыг өчигдөр Ватикан хотод үйлджээ. Ватикан хотын Гэгээн Петерийн талбайд болсон мөргөл үйлдэх ёслолын  үеэр олон мянган католик шашинтнууд, жуулчид хүрэлцэн ирж, агуу их шашны удирдагчийн сүүлчийн залбирлыг сонссон байна.

Орон нутгийн цагаар өчигдөр өдрийн 11.45 цагт эхэлсэн мөргөл үйлдэх ёслолыг өдгөө 85 настай хамба Гэгээн Петерийн талбай дахь сүмийн цонхонд байрлуулсан  чанга яригч бүхий тусгай индрээс уншиж, сургаалиа айлдсан байна.

Ёслолын үеэр Томас Смалкерз нэртэй их сургуулийн оюутан, энгийн мөргөлчөөс эхлээд католик шашинт олон арван иргэд XVI Бенедиктийг шашны үйл хэргээ үргэлжлүүлээсэй хэмээн хүсч байгааг нуулгүй илэрхийлсэн тухай эх сурвалжууд мэдээлсээр байна. Ромын хамба XVI Бенедикт эрүүл мэндийн шалтгааны улмаас энэ сарын эхээр өөрийн суудлаас татгалзаж, дараагийн шинэ хамбыг сонгох нь зүйтэй гэдгийг албан ёсоор мэдэгдсэн нь дэлхийн олон сая католикчуудын хувьд гэнэтийн мэдээ байсан юм.