Монголын оюутны холбооны Ерөнхийлөгчийн санаачилсан “Олуулаа уншъя” хөтөлбөрийн хүрээнд  зохиолч Б.Шүүдэрцэцэгтэй  цуврал уулзалт  зохион байгуулж эхэллээ. Хамгийн сүүлд “Ану хатан” түүхэн уран сайхны кино зохиол бичин, төслөө удирдсан , оюутан залуусын хамгийн дуртай зохиолчдын нэг  Б.Шүүдэрцэцэгийн уншигчидтайгаа хийх цуврал уулзалт “Гурван эрдэнэ” багшийн дээд сургуулиас эхэлж  Санхүү эдийн засгийн дээд сургууль, Монгол Солонгосын хамтарсан Политехникийн коллежид  үргэлжилж байна.  Оюутан залуусын ном унших идэвхийг нэмэгдүүлэх, үндэсний кино урлагаа дэмжиж “Ану хатан” киног хамт олноороо үзэх аян зохиох, оюутан залууст  эх оронч, тусгаар тогтнолоо дээдлэх, үндэсний эв нэгдлээ эрхэмлэх үзэл санааг төлөвшүүлэх зорилгоор МОХ энэ уулзалтыг санаачлан зохион байгуулж байна.  Энэ долоо хоногт ШУТИС дээр болох  дараагийн уулзалтад оюутнууд зохиолчоос гадна  “Ану хатан” киноны  уран бүтээлчид болох дуучин Д.Отгонжаргал /Ану хатан/, саяхан МУСТА цолоор энгэрээ мялаасан  М.Мягмар /Галдан хаан/, Данжила жанжны дүрийг бүтээсэн жүжигчин С.Ариунбямба нартай уулзах хүсэлтээ илэрхийлж байгаа ажээ.