Зам барилгын салбараар дагнасан “Road expo-2013” үзэсгэлэн, хурал анх удаа болох гэж байна. Улсын хөгжилд голлох нөлөө үзүүлэх дэд бүтцийн асуудлыг тал бүрийн байр суурьтай санал, зөвлөмжөөс үндэслэн шийдэхийн тулд ийнхүү уг үзэсгэлэн хурлыг Зам, тээврийн яам, Монголын авто замчдын холбоо, Монголын үндэсний худалдаа аж үйлдвэрлэлийн танхим, Монголын ажил олгогч эздийн нэгдсэн холбоо,  АОДЭ ХХК хамтран гуравдугаар сарын 6, 7-ны өдрүүдэд Буянт ухаа спорт цогцолборт зохион байгуулахаар боллоо. Энэ талаарх хэвлэлийн хурлыг өнөөдөр 13.00 цагт хийсэн бөгөөд энэ үеэр зохион байгуулагчдын зүгээс зам барилгын ажил өрнөхөөс өмнө амжиж хийх болсныг онцлоод зам барилгын салбарт хамтран ажиллах түншээ хайж буй бизнес эрхлэгч, аж ахуй нэгжүүдэд ач холбогдолтой болохыг сануулсан юм.

Засгийн газраас ирэх дөрвөн жилийн хугацаанд Улаанбаатар хотыг бүх аймгуудтай холбох авто замыг барих зорилт тавин ажиллаж байна. Энэ хүрээнд нийслэлээс аймгуудтай холбох 5572 км хатуу хучилттай авто зам, 990 км хурдны авто зам, нийслэл хотод 212 км авто замыг шинээр барих, 350 км авто замын өргөтгөл шинэчлэл, олон түвшингийн 7-н гүүрэн байгууламжийг барих тул салбарынхны санал, шийдэл их хэрэгтэй юм. Үзэсгэлэнгийн үеэр спорт цогцолборын гадна талбайд, дотор талд нь тусгай павилионуудад шинэ технологиудын танилцуулга, үндэсний авто замын компаниуд өөрсдийн үйл ажиллагаагаа сурталчилна. Мөн хурлаар хоёр өдрийн турш олон улсад хэрэглэгдэж буй авто замын дэвшилттэй технологиудыг ярилцах ажээ. Уг арга хэмжээнд Канад, Герман, БНХАУ, БНСУ, Япон, ОХУ, Энэтхэг зэрэг улс орнуудаас оролцохоор саналаа ирүүлээд байгаа бөгөөд цаашдаа жил бүр зохион байгуулж байх юм байна.