Ерөнхийлөгч Ц.Элбэгдоржийн санаачилсан “Дээд боловсролын санхүүжилт, суралцагчийн нийгмийн баталгааны тухай” хуулийн дагуу оюутнуудад олгож буй Үндэсний болон урамшууллын тэтгэлэг нь оюутнуудыг амжилттай, хариуцлагатай суралцахад дэмжлэг үзүүлэх зорилготой. Гэтэл улсаас өгч буй оюутны тэтгэлгийг сурч буй их, дээд сургуулиар нь дамжуулж олгоход оюутны тэтгэлэг оюутанд хугацаандаа  бүрэн хүрч чаддаггүй байсан. Мөн тэтгэлгийн мөнгийг оюутанд шууд олгохгүйгээр тухайн оюутны хичээл тасалсан мөнгө, кредитны мөнгө гэх мэтээр оюутны зөвшөөрөлгүйгээр тэтгэлгийн мөнгөнөөс нь авдаг зэрэг асуудал олныг бухимдуулдаг. Оюутны тэтгэлгийн талаар  2012-2013 оны хичээлийн жилд Засгийн газрын 1111 төв, БШУЯ-ны Боловсролын лавлах 1209 утсаар ирсэн гомдлын хамгийн өндөр буюу 38 хувь нь “Үндэсний болон урамшууллын тэтгэлэг”-ийн талаар санал гомдол бүртгэгдсэн байна. Энэ санал, гомдлыг агуулгаар нь ангилж үзэхэд “85 хувь нь оюутны тэтгэлэг хугацаандаа буухгүй байна, 10 хувь нь олгогдохгүй байна” гэсэн дүн гарсан байна.

Өнөөдөр БШУ-ны сайд Л.Гантөмөрийн А/58 тооо тушаалаар “Үндэсний болон урамшууллын тэтгэлгийг суралцагчийн картын дансаар олгох түр журам”-ыг баталсан болохийг БШУЯ-ны стратеги төлөвлөлтийн газраас мэдээллээ. Энэ журам гарсaнаар оюутан сургуулиараа дамжуулалгүй шууд өөрийн дансаа нээлгэж өөрийн гар дээр тэтгэлгийн мөнгөө бүтнээр нь авах боломжтой болсон байна. Оюутнууд тэтгэлгээ авахын тулд аль нэг банкинд “Оюутны тэтгэлгийн карт”-ын дансыг нээлгэх хэрэгтэй. Картын данс нээлгэхийн тулд хоёрдугаар сарын 25-наас эхлэн гуравдугаар сарын 11-ийг хүртэл өөрийн сонгосон банкиндаа иргэний үнэмлэх, суралцагчийн үнэмлэх, дүнгийн тодорхойлолт, цээж зурагтайгаа очин “Оюутны тэтгэлгийн карт”-ын дансаа нээлгэх юм. Оюутнууд дансаа нээлгэж дууссаны дараа арилжааны банкуудтай Сургалтын төрийн сан хамтран ажиллах гэрээ байгуулна. Гэрээ байгуулснаас хойш 30 хоногийн хугацаанд суралцагчийн тэтгэлгийн картыг олгох юм. Сургалтын төрийн сангаас оюутны тэтгэлгийг банкинд шилжүүлснээс хойш суралцагчийн данс руу 1-2 өдөрт багтаан суралцагчын данс руу шилжүүлэх юм байна.

Тус зохицуулалтыг хийснээр оюутны тэтгэлэг хугацаандаа орж, оюутнууд өөрсдөө тэтгэлгийн мөнгөө бүтнээр нь авдаг болж байна.