Нийслэлийн өмчийн харилцааны газраас Цагдаагийн ерөнхий газар болон Нийслэлийн онцгой байдлын газартай хамтран ажиллах санамж бичигт өнөөдөр гарын үсэг зурлаа. Ингэснээр эрх бүхий байгууллага, албан тушаалтны зөвшөөрөлгүйгээр иргэн, аж ахуй нэгжүүд өөрсдийн эзэмшлийн талбайг тэлэх, нийтийн эзэмшлийн газарт зөвшөөрөлгүйгээр барилга, байгууламж нэмж барьдаг зөрчилтэй хатуу тэмцэх юм байна. Өөрөөр хэлбэл, зам, талбай руу өөрийн эзэмшлийн барилга болон хашаагаа тэлэх явдал их байдгаас явган зорчигчид замын хажуугаар алхах талбайгүй болж, зам дээр явдаг билээ. Урьд нь иймэрхүү өмчийн зөрчилд Захиргааны хэргийн арга хэмжээ авдаг байсан бол ийнхүү өмчийн алба цагдаа, хүчний байгууллагуудтай хамтарснаар одоо шууд эрүүгийн хариуцлага хүлээлгэх юм байна. Үүнд тал бүрийн оролцоо чухал ажээ. Тухайлбал, Нийслэлийн өмчийн харилцааны газраас иймэрхүү зөрчлийн талаарх мэдээллийг хүлээн авах, өмчийн бүртгэл, зөвшөөрлийн байдалд хяналт тавих байдлаар зохих хууль дүрмийг сахиулж, Цагдаагийн байгууллагад хэргийг шилжүүлж өгнө. Цагдаагийн ерөнхий газраас бүрэн эрхийнхээ дагуу нийслэлийн нутаг дэвсгэрт өмчийн ямарваа зөрчил гаргасан тохиолдолд тухайн хуулийн этгээдийн үйл ажиллагаа явуулах зөвшөөрлийг шалгах, хэв журам алдагдахаас урьдчилан сэргийлэх арга хэмжээ авах ажээ. Нийслэлийн онцгой байдлын газраас энэхүү зөрчилтэй тэмцэх ажиллагаанд шаардлагатай хүн хүч, багаж, хэрэгслэлээр ханган ажиллах юм байна. Ийнхүү цагдаа, хяналтын, өмчийн бүртгэлийн байгууллагуудын шаардлагыг биелүүлээгүй, биелүүлэхээс татгалзсан тохиолдолд хуулийн дагуу шат, шатны арга хэмжээ авах замаар эрүүгийн хариуцлага ч хүлээлгэх боломжтой ажээ.
У.БОЛОР
