Өмнөх Hotmail-ын өгөгдөлүүдийг сайжруулж, сүүлийн үеийн технологид суурилан бүтээгдэж байгаа Outlook нэртэй шинэ мейлийн үйлчилгээг нээж байгаагаа Microsoft компани албан ёсоор зарлалаа. Мейлийн шинэ үйлчилгээг өнгөрсөн наймдугаар сараас туршиж, хөгжүүлэлтийн багыг ажиллуулж байсан юм. Албаны хүмүүсийн мэдээлж байгаагаар Hotmail үйлчилгээний нийт хэрэглэгчдийн тоо 300 саяыг давсан бөгөөд ачааллаа дийлэхгүй болсонтой холбон тайлбарлаж байгаа аж. Харин msn.com, live.com дээр мейл хаягтай хүмүүс шинэ хаягт шилжих бүрэн боломжтой юм байна. Ирэх наймдугаар сараас хойш Hotmail дахин шинэ хэрэглэгч бүртгэхээргүй болжээ. Outlook үйлчилгээг Windows8 үйлдлийн систем дээр суурилж зохион бүтээж байгаа бөгөөд android болон бусад систем ажилладаг болгохоор зэхэж байгаа аж. Hotmail үйлчилгээг бодвол холбоос болоод бүртгэлийн систем нь илүү энгийн бөгөөд ашиглахад хялбар байхаар хийж байгаа юм. 2012 оны зургадугаар сарын судалгаагаар Gmail-ын нийт хэрэглэгчдийн тоо 450 саяыг давсан бол Yahoo Mail үйлчилгээний хэрэглэгчид 281 саяыг давжээ. Мэргэжилтнүүдийн тооцооллоор Outlook үйлчилгээний хэрэглэгчдийн доо ирэх дөрөвдүгээр сар гэхэд 60 саяд хүрэх хандлага ажиглагдаж байгаа гэнэ. Мөн дүрс болон текстэн харилцааг хамгийн энгийн төвшинд хүргэсэн бөгөөд хүссэн телевизийн хөтөлбөр, урлаг, спортын үйл явдлыг Outlook хаягаа ашиглан үзэх боломжтой ажээ.