Монголын Хөлбөмбөгийн Холбооны 2013 оны Футзалын тэмцээн уралдаан, сургалтын нээлтийн ёслолын ажиллагаа хоёрдугаар сарын 23-ны 13:00 цагаас Монголын Хөлбөмбөгийн xолбооны Футзалын ордонд болно. Нээлтийн ажиллагааг Монголын Хөлбөмбөгийн xолбооны aлбан ёсны түнш “АПУ” ХК, “Хүүхэд-Хөлбөмбөг-Ирээдүй” хөтөлбөрийн aлбан ёсны түнш MCS Coca-Cola ХХК хамтран зохион байгуулж байгаа юм.

Энэ удаагийн нээлтийн үйл ажиллагаанд Нийслэлийн Засаг дарга бөгөөд Улаанбаатар хотын захирагч Э.Бат-Үүл, Дэлхийн Хөлбөмбөгийн xолбооны xөгжлийн хорооны гишүүн, Азийн Хөлбөмбөгийн xолбооны гүйцэтгэх хорооны гишүүн, МХБХ-ны Ерөнхийлөгч Б.Ганболд, МХБХ-ны Удирдах Зөвлөлийн гишүүд, FIFA-н Азийн гишүүн холбоодыг хариуцсан төлөөлөгч Mr.Jeysing Muthiah, FIFA-н Футзал хариуцсан мэргэжилтэн, Английн Хөлбөмбөгийн Холбооны Футзал хариуцсан дарга Mr.Graeme Dell болон бусад хүндэт төлөөлөгчид оролцоно. Нээлтийн ёслолын үеэр хөлбөмбөгийн ирээдүй болсон бяцхан тамирчдын тоглолтоос гадна урлагийн тоглолт та бүхнийг хүлээж байна. Мөн ирсэн хүүхэд бүрт АПУ компанийн Frutto жүүс, Coca cola-аар үйлчилнэ.

Мөн МХБХ-ны гол түнш байгууллагууд болох НЗДТГазар, АПУ ХК, Coca Cola ХХК болон Хэвлэл мэдээллийн багууд оролцсон тун өрсөлдөөнтэй тэмцээн та бүхнийг хүлээж байна.

Хүүхдүүдийн тэмцээн U-11, U-13, U-15, U-17 насны ангиллаар эхэлж байгаа бөгөөд нийт 69 багийн 750 гаруй өсвөрийн шилдэг хөлбөмбөгчид өрсөлдөхөөр болоод байна.

Хөлбөмбөгт хайртай хөлбөмбөгт дуртай хөлбөмбөгийн нэгэн гол зүйл болох үзэгч та бүхнийг Монголын Хөлбөмбөгийн Холбооны Футзалын ордонд хүрэлцэн ирэхийг урьж байна.