Өнөө шөнө Аваргуудын лигийн 1/8 шигшээд Испанийн “Барселона” Италийн “Милан”-тай тоглох болно. Энэхүү тоглолтын өмнө Милан хотын багт олон жил хүчин зүтгэсэн Женнаро Гаттузо нэгэн ярилцлага өгчээ. Тэрээр хуучин багаа Каталоны багийг давж гарахад тун хүндийг дурьдсан ч бөмбөг бөөрөнхий гэдгийг сануулжээ. Мөн Месси яг дэлхийн хүн мөн эсэхэд эргэлзжээ.

“Хөлбөмбөгт юуг ч урьдчилан таамаглахын аргагүй байдаг. Хөлбөмбөгийн ер нь логикоор бодож таах хэцүү. Мэдээж, “Барселона” одоогоор “Милан”-аас хамаагүй хүчтэй. Гэхдээ өнгөрсөн жил Ночерино тоог 1:1 болгож тэнцүүлж чадсныг санах хэрэгтэй. Бөмбөг бөөрөнхий шүү” хэмээн Гаттузо сануулсан байна.

“Тийм ээ, Месси шилдэг хөлбөмбөгч. Гэхдээ би Криштиано Роналдог муу гэх гээгүй юм шүү. Тэр ч гэсэн үнэмшихийн аргагүй хөлбөмбөгч. Гэвч Месси яг л өөр гаригийнх шиг. Улиралд 90 гоол оруулдаг хөлбөмбөгчийг энэ дэлхий дээр төрсөн гэж хэлэхэд хэцүү. Ийм тоглогч PlayStation-д л байдаг байх. Таван настай хүү Франческотойгоо би хааяа PlayStation тоглодог юм. Тэгээд хааяа Мессигийн тоглож буйг харахаар яг л PlayStation үзэж бут мэт санагддаг. Тэр хурдтай, ур чадвартай, гоол хийхийг хүссэн үедээ хийж чаддаг” хэмээн Гаттузо өгүүлсэн байна.

Гаттузо одоо Швейцарийн "Сьон" багт тоглож буй билээ.