Нэрт жүжигчин Стив Мартин 67 насандаа анхныхаа үрийн зулайг үнэрлэж аав болсон талаар эх сурвалжууд мэдээлжээ. Стив болоод түүний эхнэр Энние Стрингфиелд нар өнгөрөгч оны арванхоёрдугаар сард Лос-Анжелост хүүхдээ төрүүлсэн талаар хамгийн анх New York Post мэдээлж байсан ч энэ талаар кино од өөрөө албан ёсоор мэдэгдэл хийгээгүй байсан юм. Харин саяхан Стивийн хэвлэлийн төлөөлөгч People.com-д ярилцлага өгөх үеэрээ нэрт жүжигчний гэр бүл шинэ хүн угтаж авсан тухай баяртай мэдээг кино сонирхогч түүний фэнүүдэд  дуулгасан  байна.

Мартин, Стрингфиелд нар хүүхдийнхээ хамтаар одоогоор Лос-Анжелост амьдарч байгаа гэнэ. Одоогоос арван жилийн өмнө үзэгчдийг байлдан дагуулж байсан “Cheaper by the Dozen” нэртэй инээдмийн кинонд олон хүүхэдтэй аавын дүрд тоглож байсан Мартин амьдрал дээр харин ганц ч хүүхэдгүй байсан юм. Жүжигчин, дуучин гээд олон  бүсгүйтэй нэр холбогдож хоёр ч удаа гэрлэж байсан Мартин 2007 онд одоогийн эхнэр Стрингфиелдтэй гэрлэсэн байна.