УИХ-ын чуулганы хуралдааны дараа УИХ-ын дөрвөн байнгын хороо хуралдсан. Тодруулбал, УИХ-ын Хууль зүйн байнгын хороо намрын ээлжит чуулганы сүүлчийн хурлаараа Хуульчийн эрх зүйн байдлын тухай хуулийг дагаж мөрдөх журмын тухай хуулийн төслийн эцсийн хэлэлцүүлгийг хийв.  Хэлэлцэж буй асуудалтай холбоотойгоор асуулт тавих, санал хэлэх гишүүн гараагүй бөгөөд уг асуудлыг чуулганы нэгдсэн хуралдаанд шилжүүлэхийг хуралдаанд оролцсон гишүүдийн 100 хувийн саналаар дэмжлээ.   

Харин үүний дараа Эдийн Засгийн байнгын хорооны хуралдаанаар  “Улаанбаатар хотыг  2020  он хүртэл  хөгжүүлэх  ерөнхий төлөвлөгөөний  тодотгол”-ыг батлах тухай Улсын Их Хурлын тогтоолын төслийн эцсийн хэлэлцүүлгийг хийж, гишүүдийн олонхий саналаар мөн дэмжигдсэн юм. Эдийн засгийн байнгын хорооны хуралдаанаар Төрийн нууцын жагсаалт батлах тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийж, байнгын хорооны гишүүн Ж.Энхбаяр тогтоолын төслийг хойшлуулах горимын санал гаргасан ч дэмжигдээгүй юм. Тиймээс байнгын хорооны 11-9 гишүүн дэмжиж маргаашийн чуулганы хуралдаанд танилцуулахаар боллоо.

Төсвийн байнгын хорооны хуралдаанаар  Төрийн нууцын жагсаалт батлах тухай хуульд өөрчлөлт оруулах тухай хуулийн төслийн хэлэлцэн гишүүдийн олонхи дэмжсэн юм. Ийнхүү чуулганы хуралдаанаар маргааш Хуульчийн эрх зүйн байдлын тухай хуулийг дагаж мөрдөх журмын тухай хуулийн төсөл, “Улаанбаатар хотыг  2020  он хүртэл  хөгжүүлэх  ерөнхий төлөвлөгөөний  тодотгол”-ыг батлах тухай Улсын Их Хурлын тогтоолын төсөл, Төрийн нууцын жагсаалт батлах тухай хуульд өөрчлөлт оруулах тухай хуулийн төсөл, Төрийн нууцын жагсаалт батлах тухай хуульд өөрчлөлт оруулах тухай хуулийн төслүүдийг тус тус хэлэлцэх юм. УИХ-ын чуулганы хуралдаан марааш 10.00 цагт хуралдах юм.