Тайванийн шил үйлдвэрлэгч, төдийлөн нэрд гараагүй “Polytron” гэх компани тунгалаг гар утас үйлдвэрлэжээ. Одоогоор энэ гар утасны талаарх дэлгэрэнгүй мэдээлэл байхгүй байна. Ямартай ч мэдрэгчтэй дэлгэцтэй бөгөөд зургаас харвал смартфоны гэрэл зургийн камер, чип болоод мемори карт зэрэг нь бүрэн тунгалаг болж чадаагүй байна. Бага зэрэг бохирдсон шил мэт харагдах энэ тунгалаг смартфон нь одоо туршилтын шатанд яваа гэнэ.

Техник технологийн ертөнцөд хувьсгал болохуйц энэ бүтээлээ Таоюаньд болсон хэвлэлийн бага хурлын үеэр танилцуулжээ. Энэ үеэр компанийн зүгээс ямар төрлийн үйлдлийн системтэй болоод техникийн бусад үзүүлэлтийн талаар мэдээлэл өгсөнгүй. Гэхдээ энэ жилдээ багтааж үйлдвэрлэнэ гэдгээ амласан байна.

“Polytron”-ын энэ тунгалаг смартфон чухам ямар зорилгоор, энгийн смартфоноос ямар талаар илүү байх нь тодорхойгүй ч мобайл салбарт шинэ алхам болж байна.