Европол сүүлийн 18 сарын турш мөрдөн байцаалт явуулсны дүнд буурал  тивийн 15 орноос нийт 380 тохиролцооны тоглолт илрүүлжээ. Хамгийн аймшигтай нь Европын хөлбөмбөгийн холбооны хамгийн нэр хүндтэй тэмцээн болох Аваргуудын лигээс хоёр ч тоглолтын үр дүнг наймаалцсан баримт олсон байна. Гэхдээ ямар багууд энэ хэрэгт холбогдсоныг зарлаагүй ч нэг тоглолт нь Англид болсон гэжээ. Тиймээс Английн топ төвшний нэг клуб Аваргуудын лигийн хүрээнд тоглолтын үр дүнг наймаалцаж, мөнгө төлсөн нь тодорхой болж байна. Аваргуудын лигээс гадна ДАШТ ба Европын аварга шалгаруулах тэмцээний сонгон шалгаруулалтын хүрээнд тохиролцооны тоглолтууд болж байсныг олж тогтоожээ.

Европолын мэдээлснээр тохиролцооны тоглолтыг Европын бүлгийнхэнтэй нягт холбоотой ажилладаг Азийн гэмт бүлэглэлийнхэн зохион байгуулдаг байсан гэнэ. Европолын тогтоосноор клубын ажилтнууд, тоглогчид, гэмт хэрэгтнүүд гээд нийт 425 хүн тоглолтын үр дүн наймаалцсан гэх хэрэгт холбогджээ. Мөрдөн байцаалтын явцад тэдний заримыг баривчилсан байна.