Төв банк бодлогын хүүгээ бууруулах юм уу өсгөхөд арилжааны банкуудын зээлийн хүүнд 2-3 сарын дараа өөрчлөлт орох учиртай гэж Монгол банкнаас news.mn-д мэдээллээ. Өнгөрөгч нэгдүгээр сарын 25-нд Төв банк бодлогын хүүгээ гурван жилийн хугацаанд анх удаа 0,75 нэгж хувиар бууруулсан билээ. Үүнтэй холбогдуулан зээлийн хүү яльгүй буурах байх гэсэн хүлээлт бизнес эрхлэгчид болон иргэдийн дунд бий болоод байна. Төв банкны бодлогын хүү өөрчлөгдөхөд мөн хадгаламжийн хүүд өөрчлөлт орох учиртай.  Гэхдээ яг одоогоор арилжааны банкуудын зээлийн хүү өөрчлөгдсөн эсэх талаар тодорхой мэдээлэл гарч эхлээгүй байна. Харин Хаан банкны гүйцэтгэх захирал Норихито Като “Бодлогын хүү буурснаар
зээлийн болон хадгаламжийн хүү буурах боломжтой. Манай банкны хувьд
зээлийн хүүгээ бууруулах талаар одоогоор хэлэх боломжгүй байна. Зах
зээлийн хүү цаашид хэр тогтвортой байх эсэхийг бид ажиглаж байгаад
шийдвэрээ гаргана” гэж news.mn-д хэлсэн юм.

Бодлогын хүүг 2005-2010 он хүртэл өсгөж буулгаж ирсэн. Харин 2010 оны дөрөвдүгээр сараас эхлэн гурван жилийн хугацаанд тогтмол өсч 10-13,25 хувь, арилжааны банкуудын жилийн дундаж бизнесийн зээлийн хүү 19-өөс дээш хувь байсан. Бизнес эрхлэгчдэд зээлийн хүүгийн төвшинг бизнес эрхлэх хамгийн чухал хүчин зүйлс болгож үздэг билээ.