3,462.59
УИХ-ын гишүүн Д.Батцогт Хөшөөтийн уурхайн асуудалтай холбоотойгоор Уул уурхайн сайд Д.Ганхуягт асуулга тавьжээ. Ховд аймгийн Дарви, Цэцэг сумдын нутгийг дамжин орших Хөшөөтийн нүүрсний уурхайг Хятадын 100 хувийн хөрөнгө оруулалттай “Мо Эн Ко” компани эзэмшдэг байна. Уг ордыг орон нутгийн иргэд, төрийн бус байгууллагуудын зүгээс стратегийн ордод хамруулах асуудлыг тавьж тойргоосоо сонгогдсон гишүүдэд хандсанаар энэ асуудал дээд төвшинд хүрсэн байна. Гэвч дээрх асуудлаас үүдэж тус ордын үйл ажиллагаа зогсчээ. Улмаар орон нутгийн иргэд УИХ-ын гишүүн Д.Батцогтод хандаж Хөшөөтийн уурхай дагасан аж амьдрал зогсонги байдалд ороод зогсохгүй уурхайн үйл ажиллагаа зогссоноос олон арван уурхайчин ажилгүй болоод байгаа тул энэ талаар холбогдох газарт хандаж ямар арга хэмжээ авахаар ажиллаж байгаа талаар зохих мэдээлэл өгөхийг хүссэн аж. Тиймээс эрхэм гишүүн дээрх асуудлаар Уул уурхайн сайдад хандан асуулга тавьжээ.1.Хөшөөтийн ордыг стратегийн орд газрын жагсаалтад оруулах үйл явц аль шатандаа явж байгаа.
2. Хөшөөтийн уурхайг ойрын хугацаанд сэргээн ажиллуулах талаар хийж байгаа ажил байна уу. Орон нутгийн иргэдийн амьжиргааны гол эх үүсвэр болсон уг орд ажиллахгүй байгаагаас хүндхэн нөхцөл байдал үүсээд байна. Уурхайн ажиллаж эхлэх тодорхой хугацааг сонгогчид маань нэхэж байна. Ер нь Хөшөөтийн уурхайг Засгийн газар болон Уул уурхайн яамны талаас зогсоосон юм уу, эсвэл Мо Эн Ко компанийн зүгээс ажлаа зогсоосон уу.
3. Хөшөөтийн уурхайг түшиглэн байгуулахаар төлөвлөсөн 36 мегаваттын цахилгаан станцын төсөл, тооцоо, техник эдийн засгийн үндэслэлийг танилцуулах. Жилд 8 сая тонн нүүрс олборлох боломжтой гэж мэдэгдэж байгаа уг уурхайн нөөцийг 85.7 сая тонн гэж үзвэл аравхан жилийн дотор нөөц нь дуусахаар байна. Гэтэл ийм ордыг түшиглэн цахилгаан станц барих нь эдийн засгийн хувьд үр ашигтай төсөл мөн үү.
4. Уурхайн олборлолтын улмаас байгаль орчинд үзүүлж буй сөрөг нөлөөллийг бууруулах талаар хийж байгаа болон цаашид хийх ажлын талаар тодорхой мэдээлэл өгнө үү” гэсэн байна.
