Бразилийн тусгай албанаас өнгөрсөн долоо хоногт Санта Мария хотын “Kiss” шөнийн клубт гарсан галын улмаас амь үрэгдсэн хүмүүсийн дурсгалыг хүндэтгэх ажиллагааг Риу-Гранди-ду-Сул муж даяар зохион байгуулжээ. Тус арга хэмжээнд нийт дөрвөн мянга гаруй хүн оролцож, “Kiss” шөнийн клубын гадна цэцгийн баглаа болон гашуудлын үгс бүхий цааснуудыг тавьж, хэдэн минут дуугаа хураан  зогсч, хохирогчдод хүндэтгэл үзүүлжээ. Мөн энэ үеэр Санта Мария хотын даргын зүгээс галд шатсан шөнийн клубын байрыг хохирогчдын дурсгалыг хүндэтгэх газар болгох төлөвлөгөөтэй буйгаа мэдэгдсэн байна. Түүнчлэн тэнд цугларсан олон мянган хүний ихэнхи нь цагаан хувцсаар жигдэрч, лаа барьсан байсан байжээ. Энэхүү арга хэмжээ Санта Мариягаас гадна Рио-де-Жанейро хотод зэрэг зохиогдож, олон зуун хүмүүс тус хотын бэлгэдэл болсон аварга том Христийн хөшөөнд хохирогчдын төлөө залбирал үйлджээ.

Шөнийн клубын галын улмаас гэмтэж, бэртэн эмнэлэгт хүргэгдсэн 22 настай залуу өчигдөр нас барснаар одоогийн байдлаар амь үрэгдсэн хүмүүсийн тоо 237-д хүрсэн байна. Түүнчлэн галын улмаас угаартаж, гэмтсэн 100 гаруй хүн эмнэлэгт хэвтэн эмчилгээ хийлгэж байгаа бөгөөд тэднийг эмчлэхэд шаардлагатай тоног төхөөрөмжийг Америкаас авчруулаад байгаа тухай Бразилийн албаныхан ВВС-д мэдээлжээ.

Шөнийн клубт гал гарч, олон хүн амь үрэгдэж байсан тохиолдлуудыг дурдвал:

1. 2009 он Тайландын Бангкок хотын “Santika” клубт гарсан галын улмаас 66 хүн амь үрэгдсэн.
2. 2009 он ОХУ-ын Дермь хотын “Lame Horse” клубт гарсан галын улмаас 150 хүн амь үрэгджээ.
3. 2003 он Аргентины Буэнос-Айрес хотын “Cromagnon Republic” клубт гарсан галын улмаас 194 хүн нас барсан.
4. 2003 он АНУ-ын Рөүд-Айленд мужийн “The Station” клубт гарсан галын улмаас 100 хүн нас барсан байна.
5. БНХАУ-ын Лоян хотын бүжгийн танхимд гарсан галын улмаас 309 хүн амь үрэгджээ.
6. 1996 он Филиппиний Кесон хотын “Ozone” диско клубт гарсан галын улмаас 160 хүн амь үрэгдсэн байна.
7. 1990 он АНУ-ын Нью-Йорк хотын  “Happy Land” клубт гарсан галын улмаас 89 хүн нас барсан.
8. 1977 он АНУ-ын Кентаки мужийн Саутгэйт хотын “Beverly Hills Supper” клубт гарсан галын улмаас 165 хүн амь үрэгджээ.
9. 1970 он Францийн Сен-Лоран-дю-Пон дүүргийн “5-7” клубт гарсан галын улмаас 146 хүн нас барсан.
10. 1942 он АНУ-ын Бостон хотын “Cocoanut Grove” клубт гарсан галын улмаас 492 хүн амь үрэгдсэн.