Америкийн Үндэсний хөлбөмбөгийн лигийн аварга шалгаруулах 47 дахь удаагийн тэмцээн буюу “Super Bowl” маш сонирхолтой өрнөж, эцсийн мөчид ялагч тодорлоо. Шигшээ тоглолтод “Балтимор Рейвэнс” болон “Сан Франциско Форти-найнэрс” багууд тоглосон. “Рейвенс”-ийн хувьд 12 жилийн дараа шигшээ тоглолтод шалгарсан юм. “Super Bowl”-той холбоотой сонирхолтой мэдээлэл хүргэхэд, хоёр багийн дасгалжуулагч нар нь төрсөн ах дүүс ажээ.

Тоглолтын эхнээс л “Рейвенс” санаачилгыг авч, тоглолтыг тэргүүлж эхэлсэн. Гэвч гуравдугаар үеийн эхэнд цэнгэлдэхийн тог хэсэгчлэн тасарч, тоглолт 30 гаруй минут саатсан нь тоглолтын арга барилаа олоод байсан “Балтимор Рейвенс”-ийг хөргөөж, харин “Сан Франциско Форти-найнерс”-т амрах, басхүү тоглолтоо дүгнэх боломж олгосон гэж болно.

Тоглолт дахин эхлэхэд “Рейвенс”-ийн хамгаалалт, довтолгоо аль аль нь суларч, энэ боломжийг ашиглан “Форти-найнерс” дөрвөн минут, 10 секундэд 17 оноо авснаар тоглолтыг улам сонирхолтой болгов. Гэвч энэ өдөр “Рейвэнс”-ийнх байлаа. Хэдийгээр тог тасарч, тэд давамгайллаа алдахад хүрээд байсан ч эцсийн мөчид амжилттай хамгаалалт хийсний үр дүнд аварга боллоо.