“Рио Тинто” Оюутолгойн үйлдвэрлэл олборлолтыг түр зогсоох тухай хэлэлцэж байгаа гэсэн мэдээ өнөөдөр Bloomberg-ээр гарсан билээ. Энэ мэдээллийн дагуу news.mn сайтын зүгээс “Оюутолгой” ХХК-ийн Олон нийттэй харилцах албатай холбогдож тодруулахад: “Оюутолгойн төслийн уурхай, үйлдвэрлэлийн үйл ажиллагаа хэвийн үргэлжилж байна. Төлөвлөсөн ёсоор ирэх зургадугаар сард эцсийн бүтээгдхүүнээ гаргах болно. Олборлолт, боловсруулалтаа зогсоогоогүй” гэж гэж олон нийттэй харилцах албаас мэдэгдлээ. 

Монголын тал эзэмшиж буй 34 хувиа нэмэгдүүлэхээр шаардаж байгаагаас болж олборлолт болон үйлдвэрлэлийн боловсруулалтыг түр зогсоох тухай “Рио Тинто”-гийн удирдлагууд ярилцаж  эхэлсэн гэж нэрээ хэлэх боломжгүй хоёр эх сурвалж Bloomberg-т мэдээлсэн байна.

Энэ мэдээний дараахан Австралийн Мельбурн дахь “Рио Тинто”-гийн хэвлэлийн төлөөлөгч Брюс Тобин “Оюутолгойгоос үр ашгийг хүртэхийн тулд “Рио Тинто” бүх хувьцаа эзэмшигчид, тэр дундаа Монголын Засгийн газартай хамтарч ажиллана” гэж мэдэгдээд дээрх мэдээллийг үгүйсгэсэн байна.