“Монголын аялал жуулчлалын форум-2013” өнгөрсөн өдрүүдэд болж, Соёл , спорт, аялал жуулчлалтын яамнаас тус салбарын өнөөгийн хөгжил, цаашдын чиг хандлагатай холбоотой олон чухал сэдвээр ярилцлаа. Хоёр өдрийн турш хуралдсан уг форумд “Брос Рекордс Монголиа” компанийн ерөнхий продюссер М.Болд буюу Томоо оролцон, нээлтээ хийгээд удаагүй байгаа “Ертөнц” цомгоо танилцуулсан юм. Энэ сарын 16-нд Монголдоо төдийгүй дэлхий дахинд албан ёсоор нээлтээ хийсэн “Ертөнц” цомгийн хувьд контент хэлбэрээр itunes, amazon music, iheart radio, google play зэрэг сайтуудаар дэлхийн өнцөг булан бүрт хүрч худалдаалагдаж, орон орны хөгжмийн хорхойтнуудаас сайшаал магтаалын үг харамгүй сонссоор байгаа юм. Тиймээс ч авьяаслаг залуу уран бүтээлч Г.Ононгийн олон жилийн нөр их хөдөлмөр болсон “Universe” буюу “Ертөнц” цомог хэл, хил, соёл хөгжлөөс үл хамааран үнэхээр л ертөнц дахины бүтээл болсныг сонсогчид өндрөөр үнэлсээр буй. Цаг хугацааны шалгуур дааж үлдэх цор ганц бүтээл ч байж мэдэх “Брос Рекордс Монголиа” компанийн шинэ уран бүтээл ийнхүү олон улсын тавцанд орчин цагийн жинхэнэ Монгол аялгууг сурталчилж байна.