УИХ-ын Төрийн байгуулалтын байнгын хорооны хуралдаан өнөөдөр үдээс хойш болж Төрийн албаны тухай хуульд нэмэлт, өөрчлөлт оруулах тухай хуулийн төслийг хэлэлцээд олонхийн саналаар “Хэлэлцэх нь зүйтэй” хэмээн үзлээ. Энэхүү хуулийн төслийг УИХ-ын гишүүн Су.Батбалд өргөн мэдүүлжээ. Төрийн албаны зөвлөл нь төрийн албанд ажиллах албан тушаалтныг сонгон шалгаруулж байгаа одоогийн тогтолцоог өөрчилж, сонгон шалгаруулалтыг харьяалах яам бүрийн Төрийн нарийн бичгийн дарга мэдэж байх. Харин Төрийн албаны зөвлөл нь хяналт тавих үндсэн үүрэгтэй ажиллахаар заалж өгчээ. 

Хэлэлцүүлгийн шатанд УИХ-ын гишүүн Д.Эрдэнэбат “Төрийн алба бол асар том бүтэцтэй байгууллага. Тиймээс  энэ асуудлыг хэсэгчилж ярих нь зохимжгүй, цаашдаа төслийг төгөлдөршүүлэх шаардлага байна” гэсэн бол Ж.Батзандан гишүүн “Төрийн албыг шинэчилж цомхон чадварлаг баг болгох. Үүний тулд улстөрийн томилгооноос ангид байлгах үзэл баримтлалыг дэмжиж байна. Төрийн алба бол маш том байгууллага. Тиймээс асуудлыг цогцоор харах ёстой” хэмээж байсан юм. Ийнхүү гишүүд саналаа хэлж дууссаны дараагаар санал хураахад олонхи гишүүн төслийг хэлэлцэх нь зүйтэй хэмээн үзэж, чуулганы нэгдсэн хуралдаанд оруулахаар болж шийдвэрлэв.