Жолооч нар авто машинаа гоёх гэдэг ч юм уу, бусад шалтгаанаар янз бүрээр чимэглэж, тоноглох нь элбэг. Содон өнгөтэй, цонхоо битүү теньдсэн, бүдүүн яндантай гээд л дуусахгүй олон гангараатай машин байх. Мөн чимэглэлээ арай хэтрүүлж хойд гэрлээ харагдахгүй болтол нь хар болгосон машинууд ч давхиж байдаг.  Ийнхүү хэтэртэл гоёхыг Замын хөдөлгөөний дүрмээр хязгаарласан байдаг юм байна. Учир нь хойд гэрэлд наалт нааснаар мэдээлэх үүрэг нь байхгүй болж, ард нь яваа жолоочид зай барих хэмжээг багасгаж, мөн самбаачлах хугацаанд ч нөлөөлдөг. Тэгэхээр таны машины чимэглэл аюулгүй байдалд тань шууд холбоотой болж байна.

Тиймээс хэтэртэл гоёсон гоёог тань замын цагдаа нар зөвшөөрөхгүй гэдгийг санаарай. Тухайлбал замын хөдөлгөөний дүрмийн 2.3-т заасан “Харанхуй буюу үзэгдэлт хангалтгүй үед зөв талын хол, ойрын болон ар талын оврын гэрлүүд асахгүй болсон бол хөдөлгөөнөө үргэлжлүүлэхийг хориглоно” гэсэн заалт байдаг. Тухайлбал, өнөөдөр л гэхэд энэхүү заалтыг зөрчсөн нэг машины хойд гэрэлд наасан хар тенийг нь хуулуулж зөрчлийг арилгасан байна.

Үүнээс гадна машиныхаа урд шилэнд өнгөт хальс наасан машин олон байдаг. Төрийн тусгай үйлчилгээ болон банкны тусгай машинуудын л урд шилэнд тень наахыг зөвшөөрдөг бөгөөд бусад машинуудад хориглодог юм байна. 

ЗЦГ-аас гудамж замын илрүүлэн таслан зогсоох шалгалт хийж, дээрх зөрчил бүхий машиныг саатуулан зөрчлийг арилгуулах арга хэмжээ авдаг байна.