Ашигт малтмалын газрын даргаар ажиллаж байхдаа лиценз олголтыг зогсоогоод байхад 120 орчим лиценз олгосон, хайгуул хийх хугацаа нь дуусч цуцлагдаад байсан “Саусгоби сэндс” компанийн таван лицензийг эрх мэдлээ хэтрүүлэн ашиглаж сунган, нэг хайгуулын лицензийг найздаа шилжүүлсэн гэх хэрэгт шалгагдаж байгаа Д.Батхуяг нарын шүүх хурал Цагдан хорих 461 дүгээр анги дахь Эрүүгийн хэргийн шүүх танхимд хоёр дахь өдрөө үргэлжилж байна. Мөн энэ хэрэгт АМГ-ын Геологи, Уул, уурхайн кадастрын дарга Т.Даваацогт, Д.Батхуягийн найз “Зэлэм” компанийн захирал н.Жаргалсайхан, н.Бат-Ирээдүй нарын дөрвөн хүний хэргийг Баянгол дүүргийн шүүгчид дэнсэлж байгаа юм.

Хэргийг хянах явцдаа Нийслэлийн орлогч прокурор Е.Сагсай “Авлигатай тэмцэх газрын мөрдөн байцаалтын явцад Д.Батхуягийг Үндэсний аюулгүй байдлын зөвлөлөөс гаргасан ашиг малтмалын хайгуулын лиценз олголтод хязгаарлалт хийх шийдвэрийг зөрчиж, 120 орчим лицензийн зөвшөөрлийг хууль бусаар олгосон болохыг тогтоосон. Мөн ашиглалтын эрхийн хугацаа нь дуусч, АМГ-ын байцаагчид хайгуул хийх эрхийг нь цуцлаад байсан “Саусгоби Сэндс” компанийн хайгуулын таван лицензийг хууль бусаар сэргээж, нэг лицензийг өөрийн найз н.Жаргалсайханд шилжүүлсэн хэрэгт буруутгаж байгаа. Д.Батхуяг нарт ямар шийтгэл өгөхөөс үл хамааран дээрхи хууль бус лиценз олголт, эрхийг нь сэргээсэн хайгуулийн таван лицензтэй холбоотой бүх шийдвэрийг шүүхээс цуцлах байх” гэж гэж мэдэгдсэн байна.